កណ្តាលៈ ទីតាំងល្បែងសុីសងភ្នាល់បាល់ខុសច្បាប់ជ្រកក្រោមស្លាកយីហោ ស្ពតកាហ្វេ ត្រូវកម្លាំងនគរបាលព្រហ្មទណ្ឌកម្រិតស្រាល នៃស្នងការខេត្ត សហការជាមួយក្រុង-ប៉ុស្តិ៍ ចុះបង្ក្រាបបិទមិនឲ្យមានដំណើរការ ដោយដកហូតសម្ភារមួយចំនួន និងឃាត់មនុស្ស៦នាក់។
ប្រតិបត្តិការនេះ សមត្ថកិច្ចធ្វើឡើងកាលពីវេលាម៉ោង២រសៀល ថ្ងៃអង្គារ ៧កើត ខែបឋមាសាឍ ឆ្នាំច ព.ស.២៥៦២ ត្រូវនឹងថ្ងៃទី១៩ ខែមិថុនា ឆ្នាំ២០១៨ ស្ថិតនៅតាមបណ្ដោយផ្លូវលេខ២០៥ ផ្ទះលេខ៣៤៩ ក្នុងសង្កាត់តាខ្មៅ ក្រុងតាខ្មៅ ដោយកម្លាំងនគរបាលព្រហ្មទណ្ឌកម្រិតស្រាលនៃស្នងខេត្តកណ្តាល ដឹកនាំដោយវរសេនីយ៍ ឡាក់ ម៉េងធី ប្រធានការិយាល័យ សម្របសម្រួលពីលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្តាល។
ចំណែកឯទីតាំងបើកល្បែងស៊ីសងភ្នាល់បាល់តាមប្រព័ន្ធអ៊ីនធើណេតយីហោ Every Day Net ស្ថិតនៅតាមបណ្ដោយផ្លូវជាតិលេខ២១ កែងផ្លូវលេខ១១០ និងយីហោ អុីម៉ាន់នី ស្ថិតនៅតាមបណ្ដោយផ្លូវជាតិលេខ២១ បើកដំណើរការយ៉ាងរលូន ទោះបីជាពេលកន្លងមកមានសេចក្ដីប្រកាសរបស់សម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ រួមនឹងលោក ម៉ៅ ភិរុណ អភិបាល នៃគណៈអភិបាលខេត្តកណ្តាលបានប្រកាសឲ្យលុបបំបាត់ល្បែងស៊ីសងគ្រប់ប្រភេទក៏ដោយ។
ជាក់ស្ដែងនៅក្នុងក្រុងតាខ្មៅ គេឃើញមានល្បែងស៊ីសងភ្នាល់បាល់តាមប្រព័ន្ធអ៊ីនធើណេតជាច្រើនកន្លែង ដែលបានធ្វើការផ្សាយចេញពីកាស៊ីណូ កំពុងបើកដំណើរការយ៉ាងរលូន ដោយមិនមានខ្លាចអាជ្ញាធរក្រុង ឬខេត្តឡើយ ថែមទាំងផ្គើនប្រសាសន៍សម្ដេចក្រឡាហាម ស ខេង ព្រោះតែម្ចាស់ទីតាំងបានដាក់ថ្នាំបំពុលទៅសមត្ថកិច្ចមូលដ្ឋានបើកភ្នែកមិនរួចដោយមានអ្នកចូលលេងទាំងយប់ទាំងថ្ងៃ ។
ដូច្នេះហើយ សមត្ថកិច្ច និងអាជ្ញាធរពាក់ព័ន្ធ មេត្តាបន្តជួយចុះពិនិត្យមើលជាក់ស្តែង ដើម្បីឈានដល់ការបង្ក្រាប លុបបំបាត់ ស្របតាមសេចក្ដីប្រកាសរបស់សម្ដេចក្រឡាហោម ស ខេង និងការណែនាំពីលោកអភិបាល នៃគណៈអភិបាលខេត្តដើម្បីអនុវត្តតាមគោលនយោបាយភូមិ-សង្កាត់មានសុវត្ថិភាព។
សូមបញ្ជាក់ថា ទីតាំងបនល្បែងអស់ទាំងនេះសុទ្ធតែបង្កើតឲ្យមានបទល្មើស លួច ឆក់ ប្លន់ បណ្ដាលឲ្យប្រជាពលរដ្ឋមានការភ័យខ្លាច និងភាពអសន្តិសុខនៅក្នុងសង្គមផងដែរ។
ពាក់ព័ន្ធនឹងករណីខាងលើនេះ អ្នកសារព័ត៌មានពុំអាចសុំការបំភ្លឺពីអាជ្ញាធរមានសមត្ថកិច្ចបានឡើយ៕