Friday, June 8, 2018

អតីតមេបក្សប្រឆាំងធំជាងគេនៅកម្ពុជា បានចេញមកបរិយាយសារជាថ្មីពីព្រះរាជសារ របស់ព្រះមហាក្សត្រដែលបានធ្វើការអំពាវនាវឲ្យប្រជាពលរដ្ឋចេញទៅបោះឆ្នោត

ដោយ៖ អាម៉ាប៉ាប៉ាញ៉ូស

ភ្នំពេញ៖ លោក សម រង្សី អតីតមេបក្សប្រឆាំងធំជាងគេនៅកម្ពុជា ដែលកំពុងនរិទេសខ្លួន នៅក្រៅប្រទេស និងមានជាប់ពាក្យបណ្ដឹងជាច្រើនករណីនោះ បានបង្ហោះសារក្នុងបណ្ដាញទំនាក់ ទំនងសង្គម Facebook ផ្លូវរបស់ខ្លួន កាលពីថ្ងៃទី០៧ ខែមិថុនា ឆ្នាំ២០១៨នេះ។

ដោយក្នុងនោះ លោក សម រង្សី បានធ្វើការ បរិយាយសារជាថ្មីពីព្រះរាជសារ របស់ព្រះមហាក្សត្រដែលបានធ្វើការអំពាវនាវ ឲ្យប្រជាពលរដ្ឋចេញទៅបោះឆ្នោត អោយបានគ្រប់ៗ គ្នានៅថ្ងៃទី ២៩ខែ កក្ដដា ឆ្នាំ ២០១៨ខាងមុខនេះ។ ដោយក្នុងនោះដែរ លោកអតីតប្រធានបក្ស ប្រឆាំងបានចោទប្រកាន់សម្ដេចតេជោ ហ៊ុន សែន ថាបានយកព្រះនាមព្រះមហាក្សត្រ មកផ្ចាញ់ ផ្ចាលជាមួយលោក។

ដោយសារបង្ហោះបានបញ្ជាក់ថា «លិខិតនេះ បើមិនក្លែងក្លាយទាំងស្រុងទេ ក៏ក្លែងក្លាយត្រង់ កាលបរិច្ឆេទដែរ ពីព្រោះលិខិតនេះ ត្រូវគេច្នៃថា ចុះថ្ងៃ ១៨ ឧសភា ២០១៨ តែគេចាំដល់ថ្ងៃ ០៥ មិថុនា ២០១៨ ទើបផ្សព្វផ្សាយ។ វាពិតជាចម្លែកណាស់ ព្រោះលិខិតព្រះមហាក្សត្រ ចេញផ្សាយតែ ៤-១០ ថ្ងៃប៉ុណ្ណោះ មុនថ្ងៃបោះឆ្នោត។ ក៏ប៉ុន្តែលើកនេះ ចុះហត្ថលេខាជាង ២ ខែ និងចេញផ្សា យជិត ២ ខែ មុនថ្ងៃបោះឆ្នោត។បើទោះជាលិខឹត្តរបស់ព្រះមហាក្សត្រពិតឬយ៉ាងណាក៏ដោយ ខ្ញុំនៅ តែជឿជាក់ថា លិខិតណាមួយពីព្រះមហាក្សត្រ ពេលនេះ គឺធ្វើឡើងក្រោមការគំរាមកំហែង ហើយលិខិតបែបនេះអត់មានតម្លៃអ្វីទេតាមផ្លូវច្បាប់»។

បើតាមលោក សម រង្ស៊ី សម្ដេចតេជោ លោក ហ៊ុន សែន បានយកឈ្មោះព្រះមហាក្សត្រ ទៅប្រើដើម្បីផ្ចាញ់ផ្ចាលជាមួយលោក និងបោកបញ្ឆោតប្រជារាស្ត្រម្តងទៀត ដោយសារតែសម្ដេច តេជោដឹងថា ប្រជារាស្ត្រចំនួនច្រើនលើសលប់ ត្រៀមខ្លួនមិនទៅបោះឆ្នោត តាមសេចក្តីអំពាវនាវ របស់ចលនាសង្គ្រោះជាតិ ពីព្រោះប្រជារាស្ត្រយល់ច្បាស់អំពីសារៈសំខាន់ និងសារៈប្រយោជន៍ នៃការធ្វើពហិការ មិនចូលរួមក្នុងការបោះឆ្នោតក្លែងក្លាយ និងលេងសើច នៅថ្ងៃ ២៩ កក្កដា ខាងមុខនេះ។

តាមរយៈតេឡេក្រាម លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា បានចាត់ ទុកលោក សម រង្ស៊ី ដែលថាព្រះរាជសាររបស់ព្រះមហាក្សត្រលើកទឹកចិត្ត ប្រជាពលរដ្ឋកម្ពុជា ទៅបោះឆ្នោតឲ្យបានគ្រប់ៗគ្នាមានភាពមិនប្រក្រតី គឺជាការប្រមាថយ៉ាងជាក់ស្តែងលើព្រះចេស្តារ របស់ព្រះមហាក្សត្រដ៏ជាទីគោរពសក្ការៈរបស់ប្រជារាស្ត្ររបស់ព្រះអង្គ ។ លោក សុខ ឥសាន្ត បាន បន្ថែមថា បន្ទាប់ពីដើរពីកន្លែងមួទៅកន្លែងមួយ មួយជុំផែនដី ទៅពឹងពាក់បរទេស ឲ្យធ្វើការគាប សង្កត់មកលើរាជរដ្ឋាភិបាលកម្ពុជា ហើយអត់បានការស្អីទាំងអស់ នៅទឹកចុងក្រោយទណ្ឌិតសម រង្សី បែរជាមកធ្វើលិខិតទូលថ្វាយព្រះមហាក្សត្រ កុំឲ្យព្រះអង្គទ្រង់ឈ្វេងយល់អំពាវឲ្យប្រជារាស្ត្រ របស់ព្រះអង្គទៅបោះឆ្នោត តែបែរជាព្រះមហាក្សត្រ មិនធ្វើតាម ហើយព្រះអង្គទ្រង់ត្រាស់អំពាវនាវ ឲ្យប្រជារាស្ត្ររបស់ព្រះអង្គទៅបោះឆ្នោតឲ្យបានគ្រប់គ្នា ដោយមិនមានការភ័យខ្លាចពីការគាបសង្កត់ ការគំរាមកំហែងណាមួយឲ្យសោះ ដែលផ្ទុយពីគំនិតរបស់ទណ្ឌិតសម រង្សី ដែលធ្វើឲ្យទណ្ឌិតរូបនេះ ខឹងយ៉ាងខ្លាំងរហូតដល់វាយប្រហារថាព្រះរាជសាររបស់ព្រះករុណា គឺក្លែងក្លាយទៀតផង ៕

@Amapapa.News

Feature Ads