សម្តេចក្រុមព្រះនរោត្តម រណឬទ្ធិ ព្រះប្រធានគណបក្សហ្វ៊ុន ស៊ិនប៉ិច បានផ្ដាំផ្ញើពីទីក្រុងបាងកកឲ្យពលរដ្ឋទៅបោះឆ្នោតនាចុងខែកក្កដា ឆ្នាំ២០១៨ ខាងមុននេះ ខណៈដែលព្រះអង្គកំពុងគង់សម្រាកព្យាបាលរបួសនៅទីនោះ។
កាលពីថ្ងៃទី២១ ខែមិថុនា ឆ្នាំ២០១៨ ម្សិលមិញ លោក ញ៉េប ប៊ុនជិន អ្នកនាំពាក្យគណបក្ស ហ៊្វុន ស៊ិនប៉ិច បានថ្លែងប្រាប់ថាសម្តេចក្រុមព្រះ បានប្រាប់លោកថាស្ថានភាពសុខភាពរបស់ទ្រង់បានធូរស្បើយហើយ ស្របពេលជាមួយគ្នានេះទ្រង់ក៏បានផ្ដាំផ្ញើឱ្យប្រជាពលរដ្ឋនាំគ្នាទៅចូលរួមបោះឆ្នោតនាពេលខាងមុខនេះផងដែរ។ ទោះជាយ៉ាងណាក៏ដោយ គេមិនទាន់ដឹងថាតើសម្តេចក្រុមព្រះនឹងយាងចេញពីមន្ទីរពេទ្យនៅពេលណានោះទេ។
សូមរំលឹកថា ព្រះទីនាំងរបស់សម្តេចក្រុមព្រះនរោត្តម រណឬទ្ធិ បានជួបគ្រោះថ្នាក់ចរាចរណ៍កាលពីថ្ងៃទី១៧ ខែមិថុនា ឆ្នាំ២០១៨ នៅភូមិអូរតាសេក ឃុំអូរចំណារ ស្រុកព្រៃណប់ ខេត្ដព្រះសីហនុ ចន្លោះគីឡូម៉ែត្រ២០០-២០១ ខណៈដែលទ្រង់យាងទៅជួបសំណេះសំណាលជាមួយប្រជាពលរដ្ឋនៅខេត្តព្រះសីហនុ។ គ្រោះថ្នាក់នោះបានធ្វើឱ្យ អ្នកម្នាង អ៊ុក ផល្លា សោយទិវង្គត ហើយសពអ្នកម្នាងត្រូវបូជាកាលពីនៅថ្ងៃទី២០ ខែមិថុនា ឆ្នាំ២០១៨។ ចំណែកឯ សម្តេចក្រុមព្រះនរោត្តម រណឬទ្ធិ រងរបួសធ្ងន់ធ្ងរ។