រតនគិរីៈ មន្រ្តីនគរបាលស្រុកអូរជុំ ខេត្តរតនគិរីម្នាក់ បានស្លាប់ភ្លាមៗនៅនឹងកន្លែងកើតហេតុ រីឯជាស្រ្តីប្រពន្ធរងរបួសធ្ងន់ ត្រូវបានដឹកបញ្ជូនទៅកាន់មន្ទីរពេទ្យភ្លាមៗ បន្ទាប់ពីជួបហេតុការណ៍គ្រោះថ្នាក់ចរាចរណ៍រវាងរថយន្តបុកជាមួយម៉ូតូ ខណៈដែលមេឃកំពុងមានព្យុះភ្លៀងខ្លាំង។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៦៖៣០នាទីយប់ថ្ងៃទី១០ ខែមិថុនា ឆ្នាំ២០១៨ នៅចំណុចផ្លូវក្រាលកៅស៊ូ វាលរំប្លង់ ស្ថិតនៅភូមិតងកាមាល ឃុំអូរជុំ ស្រុកអូរជំ ខេត្តរតនគិរី។
សមត្ថកិច្ច ស្រុកអូរជុំ បានឲ្យដឹងថា រថយន្តបង្កម៉ាកកាមារីហើម សេរី៩៥ ពណ៌សំបកឪឡឹក ពាក់ស្លាកលេខភ្នំពេញ 2B-0362 បើកបរដោយឈ្មោះ ស្មៀន ថៃ ភេទប្រុស អាយុ៣៤ឆ្នាំ ជនជាតិគ្រឹង ទីលំនៅបច្ចុប្បន្នភូមិសាទុក ឃុំបូយ។ ចំណែកភាគីខាងម៉ូតូម៉ាកស៊ីរុស ពណ៌ខ្មៅ បើកបរដោយឈ្មោះ មាង ធន់ ភេទប្រុស អាយុ៤៥ឆ្នាំ ជនជាតិគ្រឹង (ជាមន្រ្តីនគរបាល មានឋានៈនាយរងការិយាល័យ) ស្លាប់ ឌុបប្រពន្ធឈ្មោះ ឡញ រេល អាយុ៤០ឆ្នាំ ជនជាតិទំពួន រងរបួសបាក់ជើង ត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្ត។ ជនរងគ្រោះទាំងពីរ រស់នៅភូមិគោក ឃុំល្អក់ ស្រុកអូរជុំ ខេត្តរតនគិរី។
ក្រោយកើតហេតុសមត្ថកិច្ចបានឃាត់ខ្លួនអ្នកបើករថយន្តបង្ក យកមកឃុំបណ្តោះអាសន្ន នៅជំនាញអធិការដ្ឋានស្រុកអូរជុំ ក្រោមការសម្របសម្រួលពីលោក ជា ពេជ្រ ព្រះរាជអាជ្ញាអមសាលាដំបូងខេត្តរតនគិរី។ ចំណែករថយន្ត និងម៉ូតូ យកមករក្សាទុកនៅកន្លែងអធិការដ្ឋាននគរបាលស្រុកអូរជុំ រង់ចាំចាត់ការតាមនីតិវិធីច្បាប់៕