ភ្នំពេញៈ នារីវ័យក្មេងជនជាតិវៀតណាមម្នាក់ បានលោតសម្លាប់ខ្លួនពីលើអាគារខុន DECSTLE ( ឌីខាស់ស៊ល) ជាន់ទី២៩ ស្ថិតតាមបណ្ដោយផ្លូវ២៩៤ ក្នុងសង្កាត់បឹងកេងកងទី១ ខណ្ឌចំការមន រាជធានីភ្នំពេញ កាលពីវេលាម៉ោង៧យប់ ថ្ងៃទី១០ ខែមិថុនា ឆ្នាំ២០១៨។
នារីរូបនេះឈ្មោះ ហ្វៀង ស៊ីជុគ អាយុ២៨ឆ្នាំ ជនជាតិវៀតណាម មុខរបរមេផ្ទះ ស្នាក់នៅបន្ទប់លេខ៧ជាន់ទី២៩ មានប្ដីជាជនជាតិចិន ធ្វើការនៅសាំងហ្គាពួរ មិនត្រូវស្គាល់អត្តសញ្ញាណនៅឡើយ។
ប្រភពពីកន្លែងកើតហេតុ បានឲ្យដឹងថា មុនពេលកើតហេតុ គេឮសំឡេងលាន់យ៉ាងខ្លាំង ស្រាប់តែក្រឡេកមើលទៅមុខខុនដូរ ឃើញនារីវ័យក្មេងបានស្លាប់។
នារីបម្រើម្នាក់ បានប្រាប់ឲ្យភ្នាក់ងារ CAM POST ឲ្យដឹងថា នារីរងគ្រោះ(សព) បានប៉ុនប៉ងសម្លាប់ខ្លួនតាំងពីថ្ងៃទី៩ ខែមិថុនា ឆ្នាំ២០១៨ មកម្ល៉េះ តែពុំបានសម្រេច លុះនៅថ្ងៃកើតហេតុខាងលើ ដោយសារឈ្លោះជាមួយប្តីតាមទូស័ព្ទ ពីព្រោះខឹងប្តីមានស្រីនៅសាំងហ្គាពួរ មិនព្រមមកខ្មែរសោះ ទើបឲ្យគាត់(សព)សម្រេចចិត្តលោតសម្លាប់ខ្លួន ចោលកូន ២នាក់ (កូនប្រុសអាយុ១០ឆ្នាំ និងកូនស្រីប្អូនអាយុ៩ខែ) យ៉ាងអាណោចអាធ័ម។
ក្រោយកើតហេតុសមត្ថកិច្ចជំនាញបានចុះមកធ្វើកោសលវិច័យ រួចសន្និដ្ឋានថា នារីរងគ្រោះ ពិតជាលោតពីលើអាគារខុនដូរ សម្លាប់ខ្លួន ពិតប្រាកដមែន។ ពិនិត្យចប់សពនារីរងគ្រោះ ត្រូវរថយន្តសាម៉ុយ ដឹកទៅតម្កល់ទុកនៅវត្តស្ទឹងមានជ័យ រង់ចាំសាច់ញាតិយកទៅធ្វើបុណ្យតាមប្រពៃណី៕
