header ads

Sponsor

រិទ្ធី

សហគមន៍​ខ្មែរ​កម្ពុជា​ក្រោម ប្រារព្ធ​ខួប​បាត់បង់​ទឹកដី​ខ្មែរ​ក្រោម នៅ​ថ្ងៃ​ទី​៤ មិថុនា ជា​ខួប​ទី​៦៩​ឆ្នាំ (៤ មិថុនា ១៩៤៩- ៤ មិថុនា ២០១៨) នៅ​ក្នុង​សហគមន៍​ខ្មែរ​កម្ពុជា​ក្រោម ស្ថិតនៅ​ភូមិ​គោកឃ្លាង សង្កាត់​គោកឃ្លាង ខណ្ឌ​សែនសុខ រាជធានី​ភ្នំពេញ ដែល​អាច​ផ្ទុក​មនុស្ស​បាន​ចន្លោះ​២០០ ទៅ​៥០០​នាក់ដោយគ្មានការហែរញត្តិ ដោយសារតែ​ស្ថានភាព​នយោបាយ​មាន​ភាព​តានតឹង​ខ្លាំង។

ក្នុងខួប​៦៩​ឆ្នាំ នៃ​ការបាត់បង់​ទឹកដី​ខ្មែរ​ក្រោម​នៅ​ឆ្នាំនេះ ក៏​មាន​ការចូលរួម​ពី​ព្រះរាជតំណាង​របស់​ព្រះមហាក្សត្រ ព្រះករុណព្រះបាទសម្ដេចព្រះបរមនាថ នរោត្តម សីហមុនី ដែរ។

ក្រៅពី​មិន​ហែ​ញត្តិ សហគមន៍​ខ្មែរ​ក្រោម ក៏​មិន​បាន​ដាក់​លិខិត​អញ្ជើញ​តំណាង​គណបក្ស​នយោបាយ ឱ្យ​ចូលរួម​កម្មវិធី​ដូច​រាល់​ឆ្នាំ​ដែរ ដោយ​គ្រាន់​អំពាវនាវ​ជាទូទៅ​ឱ្យ​ពលរដ្ឋ​ខ្មែរ​ចូលរួម។ នៅក្នុងកម្មវិធីនេះ សហគមន៍​ខ្មែរ​ក្រោម ក៏​នឹង​រៀបចំ​វេទិកា​សំណួរចម្លើយ ស្ដីពី​ការបាត់បង់​ទឹកដី​កម្ពុជា​ក្រោម ដើម្បី​ពង្រីក​ចំណេះដឹង​របស់​ពលរដ្ឋ ទាក់ទង​នឹង​ការបាត់បង់​ទឹកដី​ខ្មែរ​កម្ពុជា​ក្រោម​ផង​ដែរ។

លោក ថាច់ សេដ្ឋា ប្រធាន​ប្រតិបត្តិ​សហគមន៍​ខ្មែរ​ក្រោម បានរៀបរាប់ថា ចាប់​ពី​ពេល​នោះ​មក អាជ្ញាធរ​អាណានិគម​វៀតណាម បាន​ប្រើ​គ្រប់​មធ្យោបាយ​ដើម្បី​រំលាយ​ពូជសាសន៍ និង​ព្រះពុទ្ធសាសនា​ខ្មែរ​យ៉ាង​សាហាវ​ឃោរឃៅ​ជាទីបំផុត។ លោក ថាច់ សេដ្ឋា បញ្ជាក់ថា ការ​តស៊ូ​ពលី​ជីវិត​នៃ​ប្រជា​ជាតិខ្មែរ ក៏​ចាប់​ផ្ដើម​ឡើង ដើម្បី​ការពារ​អត្តសញ្ញាណ​ជាតិ សិល្បៈ វប្បធម៌ អក្សរសាស្ត្រ ព្រះពុទ្ធសាសនា ទំនៀមទម្លាប់ ប្រពៃណី​ជាតិ​ជាដើម ហើយ​ដើម្បី​សម្ដែង​នូវ​កតញ្ញុតាធម៌ និង​គារវកិច្ច ចំពោះ​វីរបុរស​ស្នេហា​ជាតិ ។

កាលពី​ឆ្នាំមុន សហគមន៍​ខ្មែរ​ក្រោម​បាន​ទទូច​ឱ្យ​របប​ក្រុងភ្នំពេញ​បញ្ចូល​ថ្ងៃ​ទី​៤ មិថុនា ជា​ទិវា​ជាតិ ដើម្បី​រំលឹក​ពី​ការបាត់បង់​ទឹកដី​កម្ពុជា​ក្រោម តែ​ត្រូវ​របប​ក្រុងភ្នំពេញ​បដិសេធ។

កាលពីថ្ងៃអាទិត្យ ទី០៣ ខែមិថុនា នៅឯវត្តខ្មែរមួយកន្លែងឈ្មោះ វត្តពោធិវង្ស ស្ថិតនៅជាយទីក្រុងប៉ារីស ប្រទេសបារាំង សមាគមសហព័ន្ធខ្មែរកម្ពុជាក្រោម បានរៀបចំពិធីបុណ្យរំលឹកខួប៦៩ឆ្នាំ នៃការបាត់បង់ទឹកដីកម្ពុជាក្រោម ថ្ងៃទី៤ ខែមិថុនា ឆ្នាំ១៩៤៩។ កម្មវិធីនេះ មានពិធីសូត្រមន្តបង្សុកូល រំលឹកវិញ្ញាណក្ខន្ធដល់បុព្វការីជន ខ្មែរកម្ពុជាក្រោម ដែលបានស្លាប់ ក្នុងការតស៊ូរើបំរះ ហើយជាចុងក្រោយនៃកម្មវិធី គឺមានការជជែកដោះដូរយោបល់ ស្តីពីស្ថានភាពសិទ្ធិសេរីភាព របស់ប្រជាជនខ្មែរ នៅឯដែនដីកម្ពុជាក្រោម បច្ចុប្បន្ននេះ។

យោងតាមហ្វេសប៊ុកកញ្ញា លី ចាន់វត្តី បានឱ្យដឹងថា៖កូនខ្មែរនៅកូរ៉េខាងត្បូង ប្រារព្ធពីធីរំលឹកខួបបាត់បង់ទឹកដី ខ្មែរកម្ពុជាក្រោម។

សូមរំលឹកថា អាណានិគម​និយម​បារាំង បាន​កាត់​ទឹកដី​ខ្មែរ​កម្ពុជា​ក្រោម ឱ្យ​ស្ថិត​ក្រោម​អាណានិគម​វៀតណាម​គ្រប់គ្រង​បន្ត នៅ​ថ្ងៃ​ទី​៤ មិថុនា ឆ្នាំ​១៩៤៩។

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post