ភ្នំពេញ ៖ កាលពីវេលាម៉ោង៣ទៀបភ្លឺ ចូលថ្ងៃទី ២៥ ខែមិថុនា ឆ្នាំ២០១៨ ស្ថិតនៅតាមបណ្ដោយផ្លូវលេខ១០៥ កែងផ្លូវ៤៣២ ក្នុងសង្កាត់ទួលទំពូង ខណ្ឌចំការមន រាជធានីភ្នំពេញមានរថយន្តម៉ាក Highlander ពណ៌ទឹកមាស ពាក់ស្លាកលេខ ភ្នំពេញ 2AB-9342 បានបុកគ្នានឹងរថយន្តម៉ាក Vigo បណ្ដាលឲ្យរថយន្ត Vigo បានរេចង្កូត និងធ្លាក់ចូលក្នុងប្រឡាយលូទឹកស្អុយ ដោយក្នុងនោះបានជាប់មនុស្សប្រុសស្រី២នាក់ នៅក្នុងរថយន្តផងដែរ។
ក្រោយពីធ្លាក់ចូលក្នុងលូវទឹកស្អុយ អ្នកបើកបរ ក្នុងរថយន្ត Vigo ក៍បានធាក់កញ្ចក់រថយន្ត ដើម្បីរំដោះខ្លួនចេញមកក្រៅ ឲ្យគេជួយផងដែរ ចំណែកម្ចាស់ រថយន្ត Highlander ក៏បានរងរបួសបាក់ដៃ និងត្រូវបានមិត្តភក្ដិដឹកយកទៅសង្គ្រោះនៅមន្ទីរពេទ្យ។
ក្រោយពេលកើតហេតុសមត្ថកិច្ចជំនាញចរាចរណ៍ បានចុះមកធ្វើការវាស់វែង និងស្ទូចយករថយន្តទាំង២គ្រឿង ដើម្បីយកទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយតាមនីតិវិធីច្បាប់៕
