សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា បានអញ្ជើញកាត់ឬសសីមាសម្ពោធសមិទ្ធផល និងស្រោចស្រព ព្រះសុគន្ធវារី ប្រគេនព្រះសង្ឈ នៅវត្តព្រះឥន្ទសាមគ្គីធម៌ នៅស្រុកអង្គស្នួល ខេត្តកណ្តាល នាព្រឹកថ្ងៃអង្គារ ១៤កើត ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៦ ខែមិថុនា ឆ្នាំ២០១៨។ បើតាមគម្រោងក្នុងពិធីនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ក៏ចូលរួមជាអធិបតីជាមួយសម្តេច ហ៊ុន សែន ដែរ ប៉ុន្តែលោកជំទាវ អវត្តមានដោយសារជំងឺ។
សម្តេច ហ៊ុន សែន បានថ្លែងថា ភរិយាសម្តេចគឺ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលនឹងគ្រោងមកជាមួយលោកក្នុងពិធីនេះបានផ្លាស់ប្តូរវិញដោយសារបញ្ហាសុខភាព ទើបមិនអាចឱ្យលោកជំទាវចេញមកជាមួយសម្តេច។
សម្តេច ហ៊ុន សែន បាបញ្ជាក់ថា មិនជាធ្ងន់ទេ គាត់នៅតែដួសបាយឱ្យខ្ញុំករុណាខ្ញុំទទួលទានបានហ្នឹង ក៏ប៉ុន្តែវាជាធម្មតាទេមានជំងឺនេះ មានជំងឺនោះ បានជាខ្ញុំករុណាខ្ញុំមិនសូវបានដើរជាមួយប្រពន្ធទេឥឡូវនេះ។
សម្តេចតេជោ ថ្លែងបន្តទៀតថា៖ គាប់ជួនថ្ងៃនេះត្រូវមកណា សម្លៀកបំពាក់គ្រោងមកអស់ទៅហើយ។ តែគាត់មានបញ្ហា មិនដឹងគាត់ទទួលទានអីបានទៅជាអ៊ីចឹងទៅ អ៊ីចឹងទេបានជាសុំអភ័យទោសផង។