ភ្នំពេញៈ ទាំងប្រជាពលរដ្ឋ និងអាជ្ញាធរមានសមត្ថកិច្ច បានភ្ញាក់ផ្អើលទាំងក្បាលព្រលប់ ក្រោយបុរសម្នាក់ បានស្រង់រូបសំណាក់បុរាណមួយកំណាត់ផ្នែកខាងលើចេញពីស្រះទឹកក្បែរដីឡូត៍មួយកន្លែង ដោយសង្ស័យថា ជាវត្ថុបុរាណមានតម្លៃ។ ហេតុការណ៍នេះ បានបង្កឲ្យមានការភ្ញាក់ផ្អើលឡើងកាលពីវេលាម៉ោង៨៖៣០នាទីយប់ ថ្ងៃទី១៦ ខែមិថុនា ឆ្នាំ២០១៨នេះ នៅចំណុចផ្លូវរថភ្លើង ភូមិបឹងមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភំ្នពេញ។
តាមការបញ្ជាក់ពីបុរសឈ្មោះ ម៉ន សាវី វ័យប្រមាន៥០ឆ្នាំ ដែលជាប្រជាពលរដ្ឋរស់នៅកន្លែងកើតហេតុខាងលើ និងជាអ្នកស្រង់រូបសំណាក់នោះ បានឲ្យដឹងថា លោកបានប្រទះឃើញរូបសំណាក់បុរាណនេះ នៅក្នុងស្រះទឹកក្បែរដីឡូត៍មួយកន្លែង ដែលកប់នៅក្នុងស្មៅ។ ភ្លាមៗនោះ លោកបានប្រមៀលរូបសំណាក់នោះចេញពីស្មៅក្នុងបឹង បំណងយកទៅដាក់នៅវត្តទួល ប៉ុន្តែក្រោយពីស្រង់ចេញពីស្មៅក្នុងបឹង លោកបានយកមកដាក់នៅផ្លូវក្បែរផ្ទះ។ លុះមកដល់រសៀលថ្ងៃសៅរ៍ ទី១៦ ខែមិថុនា ឆ្នាំ២០១៨នេះ ស្រាប់តែមានបងប្អូនប្រជាពលរដ្ឋអ្នកជិតខាង បាននាំគ្នាលាងសម្អាតនូវរូបសំណាក់ខាងលើ ហើយក៏មានការភ្ញាក់ផ្អើលថា ជារូបសំណាក់ពីបុរាណ ជាវត្ថុសក្ក័សិទ្ធិ ក៏បាននាំគ្នាសែនផ្កាផ្ញីអុជធូបទាន ដើម្បីសុំសេចក្ដីសុខសេចក្ដីចម្រើនតែម្ដង។
បន្ទាប់ពីមានការភ្ញាក់ផ្អើលនេះឡើង ភ្លាមនោះក៏មានអាជ្ញាធរសមត្ថកិច្ចមូលដ្ឋាន បានចុះមកដល់កន្លែងកើតហេតុដើម្បីសួរនាំ ហើយក្រោយមកទាំងសមត្ថកិច្ច និងប្រជាពលរដ្ឋ បានមូលមតិគ្នាយករូបសំណាក់ខាងលើ ទៅដាក់តម្កល់នៅវត្ត ដើម្បីទុកជាការគោរពបូជា។
សូមបញ្ជាក់ថា ចំពោះការភ្ញាក់ផ្អើលដោយប្រទះឃើញរូបចម្លាក់ខាងលើនេះ នៅមិនទាន់មានមន្ត្រីជំនាញ ឬខាងមន្ទីរវប្បធម៌ក្រុង ចុះទៅពិនិត្យ ឬវិភាគបញ្ជាក់ឲ្យច្បាស់ថា ជាវត្ថុបុរណ ឬយ៉ាងណានោះទេ៕
