ប៉ៃលិនៈ យុវជនប្រុសស្រី៤នាក់ ត្រូវសមត្ថកិច្ចធ្វើការឃាត់ខ្លួន ពាក់ព័ន្ធករណីប្រើប្រាស់ និងជួញដូរសារធាតុញៀន ដោយដកហូតថ្នាំញៀន៤កញ្ចប់ធំ និងកាំភ្លើង១ដើម កាលពីវេលាម៉ោង១១៖៣០នាទីព្រឹក នាទីថ្ងៃអាទិត្យ ១២កើត ខែបឋមាសាឍ ឆ្នាំច សំរិទ្ធិស័ក ព.ស២៥៦២ ត្រូវនឹងថ្ងៃទី២៤ ខែមិថុនា ឆ្នាំ២០១៨ ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
សមត្ថកិច្ចឲ្យដឹងថា សមត្ថកិច្ចជំនាញបានឃាត់ខ្លួនជនសង្ស័យចំនួន៤នាក់ រួមមាន ១-ឈ្មោះ ស៊ឹម សេរីភាព ហៅអាមោក ភេទប្រុស អាយុ២៤ឆ្នាំ មុខរបរមិនពិតប្រាកដ, ២-ឈ្មោះ និត សុខភត្រា ភេទប្រុស អាយុ១៧ឆ្នាំ មុខរបរមិនពិតប្រាកដ, ៣-ឈ្មោះ នុត មករា ហៅអាឈុយ ភេទប្រុស អាយុ១៦ឆ្នាំ មុខរបរសិស្ស និង៤-ឈ្នោះ អែម វិនជិង ហៅស្រីអូន អាយុ១៩ឆ្នាំ មុខរបរនៅផ្ទះ (គ្មានសារធាតុញៀន)។ ជនសង្ស័យទាំង៤នាក់ រស់នៅភូមិឃុំកើតហេតុខាងលើ។
ក្រៅពីឃាត់ខ្លួនជនសង្ស័យ សមត្ថកិច្ចក៏ដកហូតបានវត្ថុតាង រួមមាន ម្សៅក្រាមព៌ណសថ្លា (ម៉ាទឹកកកICE) ចំនួន៤កញ្ចប់ធំ ទម្ងន់ស្មើនឹង៧,៤៥ក្រាម ថ្លឹងទាំងថង់ប្លាស្ទិក, ជញ្ជឹងថ្លឹងថ្នាំញៀន១គ្រឿង, អាវុធខ្លីម៉ាក K៥៤ ចំនួន១ដើម និងគ្រាប់ចំនួន២គ្រាប់ ព្រមទាំងឧបករណ៍សម្រាប់ប្រើប្រាស់ និងថង់វេចខ្ចប់មួយចំនួនទៀត។
បច្ចុប្បន្នករណីខាងលើ កម្លាំងជំនាញការិយាល័យប្រឆាំងបទល្មើសគ្រឿងញៀន កំពុងកសាងសំណុំរឿង ចាត់ការទៅតាមនីតិវិធីច្បាប់៕