Friday, June 1, 2018

កុងតឺន័រ ជែងខ្វះការប្រុងប្រយ័ត្ន ជ្រុលទៅបុកអាព្រូ​ស ខ្ទេចមួយកំណាត់ក្រោយ តែសំណាង

អាម៉ាប៉ាប៉ាញ៉ូស

ស្វាយរៀងៈ រថយន្តកុងតឺន័រមួយគ្រឿង បើកជែងខ្វះការប្រុងប្រយត្ន័ ក៏​ជ្រុលទៅបុកគូទរថយន្ត ព្រូសយ៉ាងពេញទំហឹង​ សំណាងមនុស្សប្រុសស្រី៣នាក់ ក្នុងរថយន្តមិនមានរងរបួស។

គ្រោះថ្នាក់ចរាចរណ៍នេះ បានកើតឡើងកាលពីម៉ោង៨ព្រឹកថ្ងៃព្រហស្បតិ៍ ២រោច ខែជេស្ឋ សំរឹទ្ធិស័ក ព.ស ២៥៦២ ត្រូវនឹងថ្ងៃទី៣១ ខែឧសភា ឆ្នាំ២០១៨ ស្ថិតក្នុងភូមិបាក់រនាស់ សង្កាត់សង្ឃរ៍ ក្រុងស្វាយរៀង ខេត្តស្វាយរៀង។

សមត្ថកិច្ចនគរបាលក្រុងស្វាយរៀង បានឲ្យ​ដឹងថា រថយន្តម៉ាកព្រូ​សដែលរងគ្រោះមានម្ចាស់ឈ្មោះ ហាក់ បូទុម ភេទស្រី អាយុ២៨ឆ្នាំ មុខរបរ​លក់ដូរ រស់នៅភូមិតាហោ សង្កាត់ពោធិ៍តាហោ ក្រុងស្វាយរៀង និងអ្នក​រួមដំណើរជាមួយកូនស្រី និងឪពុកផងដែរ។ ចំណែករថយន្តបង្កហេតុម៉ាក ហីណូ ពណ៌សលាយខៀវ ពាក់ស្លាកលេខភ្នំពេញ ៣C-៨៨៥៣ បើកបរដោយ​ឈ្មោះ ស៊ុន ឈឹម ភេទ​ប្រុស អាយុ៤៨ឆ្នាំ មុខរបរបើកបរ រស់នៅភូមិត្រាច ឃុំមហាសាំង ស្រុកភ្នំស្រួច ខេត្តកំពង់ស្ពឺ មិនមានរងរបួសអ្វីនោះទេ។

តាមសាក្សី​ បានឲ្យ​ដឹងថា មុនពេល​កើតហេតុរថយន្តព្រូ​ស ពណ៌ខ្មៅ ពាក់ស្លាកលេខភ្នំពេញ ២AU-០៦៧៦ បើកបរដោយ​ឈ្មោះ ហាក់ បូទុម និងអ្នករួមដំណើរ២នាក់ទៀត លើកំណាត់ផ្លូវជាតិលេខ១ ក្នុងទិសដៅពីលិចមកកើត ខណៈមកដល់ចំណុចកើតហេតុ ស្រាប់តែមានរថយន្តកុងតឺន័រខាងលើ បើកបរក្នុង​ទិសដៅស្របគ្នា បានវ៉ាជែងខ្វះការប្រុងប្រយត្ន័ រួចអកសឺ ក៏បុករថយន្តព្រូសពេញទំហឹងលាន់ដូចរន្ទះ បណ្ដាលឲ្យ​ខូចខាតផ្នែកខាងក្រោយយ៉ាងដំណំ សំណាងមនុស្សក្នុងរថយន្តមិនរងរបួស។

ក្រោយមកសមត្ថកិច្ចនគរបាលបានមកដល់ធ្វើការវាស់វែង និងអូសយករថយន្តទាំងពីគ្រឿងមកការិយាល័យចរាចរណ៍ខេត្តស្វាយរៀង ដើម្បីដោះស្រាយ​តាមច្បាប់៕

@Amapapa.News

Feature Ads