ភ្នំពេញ៖លោក យូ ហុកគ្រី អនុប្រធានគណបក្សហ៊្វុនស៊ិនប៉ិច បានថ្លែងប្រាប់ក្រុមអ្នកសារព័ត៌មាន នៅថ្ងៃទី១៨ ខែមិថុនា ឆ្នាំ២០១៨នេះថា គណបក្សហ៊្វុនស៊ិនប៉ិច នឹងដាក់សំណើរទៅកាន់រាជរដ្ឋាភិបាល និងក្រសួងមហាផ្ទៃដើម្បីបើការសើបអង្កេតករណីគ្រោះថ្នាក់ចរាចរណ៍ លើក្បួនរថយន្ត សម្ដេចក្រុមព្រះ។
លោកបានបន្តថា គ្រោះថ្នាក់ចរាចរណ៍មកលើក្បួនសម្ដេចក្រុមព្រះ នរោត្តមរណឬទ្ធិ និងបណ្ដាលឲ្យអ្នកម្នាង អ៊ុក ផល្លា សោយទីវង្កត់នេះ ត្រូវតែស្វែងរកការពិតឲ្យឃើញសឬខ្មៅ ព្រោះថាករណី គ្រោះថ្នាក់ចរាចរណ៍នេះ បានកើតឡើងមកលើក្បួនរថយន្តសម្ដេចក្រុមព្រះ ៣លើកមកហើយ។
លោកបានបញ្ជាក់ថា គ្រោះថ្នាក់ចរាចរណ៍លើសម្តេចក្រុមព្រះ នរោត្តម រណឫទ្ធិ និងអ្នកម្នាង អ៊ុក ផល្លា គឺលើកទី១ នៅថ្ងៃទី២៥ ខែមេសា ឆ្នាំ២០១៥ នៅខេត្តកំពង់ចាម។ លើកទី២ នៅខេត្តកំពត និងលើកទី៣ នៅថ្ងៃទី១៧ ខែមិថុនា ឆ្នាំ២០១៨ នៅខេត្តព្រះសីហនុ ៕
