ជីវប្រវត្តិសង្ខេបរបស់អ្នកម្នាង អ៊ុក ផល្លា អ្នកម្នាងកើតនៅថ្ងៃទី២៧ ខែកក្កដា ឆ្នាំ១៩៧៩ អ្នកម្នាងគឺជាអតីតតំណាងអប្សរារបស់ប្រទេសកម្ពុជា។ អ្នកម្នាង អ៊ុក ផល្លា បានចូលហាត់រៀនរបាំបុរាណនៅសាលាភូមិន្ទវិចិត្រសិល្បៈ តាំងពី វ័យ៩ឆ្នាំ ហើយបានចេញសម្តែងលើកដំបូងជាសាធារណៈ ពេលចម្រើនវ័យបាន១៣ឆ្នាំ។ អ្នកម្នាងបានបែកបាក់ជាមួយអតីតស្វាមីមុននឹងរួមរស់ជាមួយនឹងសម្តេចក្រុមព្រះ នរោត្តម រណឫទ្ធិ។
ចំណងស្នេហារបស់អ្នកម្នាង ជាមួយសម្តេចក្រុមព្រះ នរោត្តម រណឫទ្ធិ ទទួលបាននបុត្រា ២ ព្រះអង្គ គឺនរោត្តម រណវង្ស និង នរោត្តម សុធាឫទ្ធិ។ សម្រាប់ជីវិតនយោបាយ អ្នកម្នាងក៏បានឈរឈ្មោះ ជាបេក្ខនារីតំណាងរាស្ត្រពេញសិទ្ធិ លំដាប់លេខរៀងទី១ នៅមណ្ឌលខេត្តព្រៃវែង របស់គណបក្សហ្វ៊ុន ស៊ិនប៉ិច សម្រាប់ការបោះឆ្នោតជ្រើសតាំងតំណាងរាស្រ្តនីតិកាលទី៦ នាខែកក្កដា ឆ្នាំ២០១៨ ខាងមុខនេះ។
តែជាអកុសល អ្នកម្នាង អ៊ុក ផល្លា បានសោយទិវង្គតក្នុងព្រះជន្មាយុ៣៩ វស្សា ដោយគ្រោះថ្នាក់ចរាចរណ៍កាលពីព្រឹកថ្ងៃអាទិត្យទី១៧ ខែមិថុនា នៅភូមិអូរតាសេក ឃុំអូរចំណារ ស្រុកព្រៃណប់ ខេត្ដព្រះសីហនុ ចន្លោះគីឡូម៉ែត្រ២០០-២០១ ខណៈពេលដែលអ្នកម្នាង និងសម្ដេចក្រុមព្រះធ្វើដំណើរយាងទៅកាន់ទីក្រុងព្រះសីហនុ ដើម្បីជួបសំណេះសំណាលជាមួយអ្នកគាំទ្រគណបក្សហ្វ៊ុន ស៊ិនប៉ិច។
សូមបញ្ជាក់ថា សពអ្នកម្នាង អ៊ុក ផល្លា កំពុងតម្កល់ធ្វើបុណ្យនៅក្នុងបរិវេណវត្តបទុមវតី រាជធានីភ្នំពេញ ហើយសពនឹងត្រូវបូជានៅថ្ងៃទី២០ ខែមិថុនា ឆ្នាំ២០១៨ ខាងមុខនេះ ចំណែកឯ សម្តេចក្រុមព្រះ នរោត្តម រណឫទ្ធិ ត្រូវបានបញ្ជូនទៅព្យាបាលនៅមន្ទីរពេទ្យនៅប្រទេសថៃ កាលពីម៉ោងជាង១២ រំលងអាធ្រាតឈានចូលថ្ងៃទី១៨ ខែមិថុនា ឆ្នាំ២០១៨ ដោយសារតែស្ថានភាពរបួសរបស់ព្រះអង្គធ្ងន់ធ្ងរ គឺពាក់ព័ន្ធនឹងឆ្អឹង។
គួររំលឹកថា អ្នកម្នាង អ៊ុក ផល្លា និងសម្តេចក្រុមព្រះ នរោត្តម រណឫទ្ធិ ធ្លាប់ជួបឧបទ្ទវហេតុម្ដងហើយ កាលពីប៉ុន្មានឆ្នាំមុននេះនៅឯខេត្តកំពង់ចាម។
