ព្រះសីហនុៈ យ៉ាងហោចណាស់មនុស្សចំនួន២នាក់ បានស្លាប់ និងម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍មួយ បានកើតឡើងរវាងរថយន្ត ISUZU បុកជាមួយរថយន្តកុងតឺន័រ កាលពីវេលាម៉ោង១០យប់ថ្ងៃទី៨ ខែមិថុនា ឆ្នាំ ២០១៨ លើផ្លូវជាតិលេខ៤ ចន្លោះបង្គោលគីឡូម៉ែត្រលេខ 134-135 ភូមិបឹងត្រាច ឃុំចំការហ្លួង ស្រុកកំពង់សីលា ខេត្តព្រះសីហនុ។
គ្រោះថ្នាក់ចរាចរណ៍នេះ បង្កដោយរថយន្តម៉ាក អ៊ីហ៊្សុយហ៊្សុយ ISUZU ចង្កូតស្តាំ ពណ៌ទឹកប្រាក់ ពាក់ស្លាកលេខព្រះសីហនុ 2A-2417 មានទិសដៅពីភ្នំពេញទៅខេត្តព្រះសីហនុ បានរេចង្កូតចូលទៅបុករថយន្តម៉ាក ហ៊ីយ៉ាន់ដាយ HYUNDAI ក្បាលពណ៌ស ទ្រុងពណ៌ស ពាក់ស្លាកលេខ ព្រះសីហនុ 3A-6591 ក្នុងទិសដៅបញ្ច្រាសទិសគ្នា ។
គ្រោះថ្នាក់ចរសចរណ៍ខាងលើនេះ បណ្តាលឲ្យរថយន្ត ISUZU មានគ្នា៣នាក់ ក្នុងនោះស្លាប់ ២នាក់ និងរបួសធ្ងន់ម្នាក់ ១/ ឈ្មោះ ម៉េង និត ភេទប្រុស អាយុ ២៤ឆ្នាំ ជនជាតិខ្មែរ ជាអ្នកបើកបរ(ស្លាប់)២/ ឈ្មោះ មាស ចិត្រា ភេទប្រុស អាយុ ២៣ឆ្នាំ ជនជាតិខ្មែរ(ស្លាប់) ៣/ ឈ្មោះ មិន ណែត ភេទប្រុស អាយុ៣១ឆ្នាំ ជនជាតិខ្មែរ របួសធ្ងន់ ត្រូវបានកម្លាំងកងរាជអាវុធហត្ថស្នាក់ការសនិ្តសុខ ៤០២ សហការជាមួយកំលាំងនៃអធិការដ្ឋាននគរបាលស្រុកកំពង់សីលា បញ្ជូនទៅមន្ទីរពេទ្យបង្អែកស្រុកស្រែអំបិល អ្នកទាំងបីរស់នៅភូមិអូរត្រេះ ឃុំអូត្រេះ ស្រុកស្ទឹងហាវ ខេត្តព្រះសីហនុ។ ចំណែកអ្នកបើកបររថយន្តហ៊ីយ៉ាន់ដាយបានរត់គេចបាត់។
ក្រោយកើតហេតុសាកសពជនរងគ្រោះ ត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី។ ចំណែករថយន្តទាំងពីរគ្រឿងខូចខាតធ្ងន់ សមត្ថកិច្ចបានហៅរថយន្តស្ទូចយកទៅរក្សាទុកនៅអធិការដ្ឋាននគរបាលស្រុកកំពង់សីលា ដើម្បីបន្តតាមនីតិវិធី៕
