Thursday, June 7, 2018

ជនជាតិចិនមួយក្រុម ស្រវឹងជោកជាំបើករថយន្ត Mercedes បុករះរថយន្ត Audi និង Toyota រួចគេចខ្លួនបាត់

អាម៉ាប៉ាប៉ាញ៉ូស

ភ្នំពេញៈ ជនជាតិចិនមួយក្រុម ស្រវឹងធ្លាក់ភ្នែក បើករថយន្ត Mercedes ស៊េរីទំនើបរេពេញផ្លូវ ទៅបុករថយន្ត២គ្រឿង ដែលឈប់ចតស្ងៀម បណ្តាលឲ្យរងការខូចខាតទាំងសងខាងទាំង៣គ្រឿងតែម្ដង ប៉ុន្តែពួកគេដោះស្រាយសងតែម្ចាស់រថយន្ត Audi ខណៈម្ចាស់រថយន្តរងគ្រោះម៉ាក Toyota មិនព្រមសង ហើយគេចខ្លួនបាត់អស់។ ហេតុការណ៍នេះ កើតឡើងកាលពីវេលាម៉ោង១១៖៣០នាទីយប់ ថ្ងៃពុធ ទី៦ ខែមិថុនា ឆ្នាំ២០១៨ ត្រង់ចំណុចខាងមុខហាង "ពិភពសាច់អាំង១"​ តាមបណ្តោយផ្លូវ៥៩០ ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ​។

សាក្សីឃើញហេតុការណ៍ផ្ទាល់ ប្រាប់ឲ្យភ្នាក់ងារសារព័ត៌មាន CAM POST ដឹងថា នៅមុនពេលកើតហេតុ គេឃើញ​ជនជាតិ​ចិន​ប្រុស​ស្រី​មួយ​ក្រុម មានគ្នាប្រាំទៅប្រាំមួយនាក់ ជិះរថយន្ដ​មួយ​គ្រឿង​ម៉ាក Mercedes ​ML500​ ពណ៌​ស​ ពាក់​ស្លាក​លេខ​ ភ្នំពេញ​ 2AA-2182​ ដែលបើកបរ​ក្នុង​ស្ថានភាព​ស្រវឹង​ជោកជាំតាម​បណ្ដោយ​ផ្លូវ​លេខ​៥៩០​ ទិសដៅ​ពី​កើត​ទៅ​លិច​ ក្នុង​ល្បឿន​យ៉ាង​លឿន​ និង​រ៉េពេញ​ផ្លូវ​។ លុះ​មក​ដល់​ចំណុច​កើត​ហេតុ រថយន្ដ​បង្ក​ខាងលើ​ក៏បាន​រ៉េចង្កូត​ទៅ​ខាង​ឆ្វេង​ទៅ​បុករថយន្ត​មួយ​គ្រឿង​ទៀត​ម៉ាក​ TOYOTA Hilux ពណ៌ខៀវ​ ជា​ប្រភេទ​ពី​របាំង​ ពាក់​ស្លាក​លេខ​ ភ្នំពេញ ​2F-0314​ ដែល​ឈប់​ចត​ចោល​នៅ​លើ​ចិញ្ចើម​ផ្លូវ ​បណ្ដាល​ឲ្យកំពិត​ខាងក្រោយ​ចំហៀង​ខាង​ស្ដាំ​។ ភ្លាមៗនោះ ​អ្នកបើករថយន្ដ​បង្ក​បានប្រឹង​បួង​ចង្កូត​ទៅ​ខាង​ស្តាំ​ ក៏ជ្រុលទៅ​បុក​រថយន្ត​មួយ​គ្រឿង​ទៀត​ម៉ាក Audi​ មិន​ចាំ​ស្លាក​លេខ​ ឈប់ចតចោលនៅ​ចិញ្ចើម​ផ្លូវ ​បណ្ដាល​ឲ្យ​រងការខូចខាត​។ ចំណែកឯ​រថយន្ដ​បង្ក​រងការខូចខាត​កំពិត​ផ្នែក​ទាំង​សង​ខាង​នៃរថយន្ត​។

ប្រភពដដែល​បន្ត​ថា​ បន្ទាប់មក ​ម្ចាស់រថយន្ត​ Audi បានចេញពី​​ហាងពិភពសាច់អាំង១​ ហើយបានធ្វើការដោះស្រាយ​ជា​មួយ​ភាគីខាង​រថយន្ដ​បង្ក​ ដោយ​ភាគី​ខាង​រថយន្ត​បង្ក​បាន​ចេញ​សំណង​ចំនួន​៥០០ដុល្លាររ ​ដើម្បី​បញ្ចប់​រឿង ​ហើយ​រថយន្ត​ Audi ក៏​បាន​បើក​ចេញ​ទៅ​បាត់។ ដោយឡែក ​រថយន្ដ​ TOYOTA ​រងគ្រោះ​មួយ​គ្រឿង​ទៀត​ បានទាមទារ​សំណង​ចំនួន​៣០០ដុល្លារ ​ពី​ខាង​រថយន្ដ​បង្ក​ដើម្បី​បញ្ចប់​រឿង​ តែ​ភាគី​ខាង​រថយន្ដ​បង្ក​មិនព្រម​សង​នោះទេ ហើយ​ថែមទាំង​នាំគ្នា​គេច​ខ្លួន​ចេញ​ពី​កន្លែង​កើត​ហេតុ​បាត់ស្រមោល​ បន្សល់ទុកតែ​បុរស​ជាជនជាតិ​ចិន​ម្នាក់​ ស្រវឹង​ដេក​ក្អួត​ពេញក្នុង​រថយន្ត​ដោយ​មិន​ខ្វល់​ពី​អ្វី​ទាំង​អស់។

ក្រោយពេលកើតហេតុ​ សមត្ថកិច្ច​មូលដ្ឋាន​ ក៏​ដូចជា​សមត្ថកិច្ច​ជំនាញ​ខណ្ឌទួលគោក បាន​ចុះ​មក​ដល់​ចំណុច​កើត​ហេតុ ស្រាប់តែបុរស​ម្នាក់ ​ដែល​ជាម្ចាស់​ហាង​ពិភព​សាច់​អាំង​១ ដែលគេ​មិន​ដឹង​ថា ​ត្រូវ​ជា​អ្វី​នឹង​ម្ចាស់​រថយន្ត​បង្កខាងលើ​នោះទេ បាន​ចេញ​មុខ​មក​ធ្វើ​ការសម្របសម្រួល​ជាមួយ​ម្ចាស់​រថយន្ត​រង​គ្រោះ ដោយព្រម​សងភាគី​រថយន្ដ​រង​គ្រោះ​ចំនួន​២០០ដុល្លារ​ ដើម្បី​បញ្ចប់​រឿង​នៅ​នឹង​កន្លែង​កើត​ហេតុ៕

@Amapapa.News

Feature Ads