ភ្នំពេញៈ រថយន្តឡិចស៊ិស RX 350 មួយគ្រឿងបានរងការខូចខាតផ្នែកខាងមុខទាំងស្រុង ខណៈបើកបរឆ្លងផ្លូវត្រូវរថយន្តស្ទូចមួយគ្រឿងកំពុងបើកលឿនជ្រុលបុកពេញទំហឹង កាលពីព្រឹកថ្ងៃទី១០ ខែមិថុនា ឆ្នាំ២០១៨ ស្ថិតនៅតាមបណ្តោយផ្លូវក្រវាត់ក្រុង សង្កាត់ជើងឯង ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថា ដំបូងគេឃើញថយន្តម៉ាកឡិចស៊ិស RX 350 ពណ៌ស ពាក់ស្លាកលេខ ភ្នំពេញ 2AV 9676 ធ្វើដំណើរពីវត្តត្រពាំងថ្លឹងឡើងមកផ្លូវក្រវាត់ ស្របពេលនោះមានរថយន្តស្ទូចមួយគ្រឿងកំពុងបើកទិសពីផ្លូវ៦០ម៉ែត្រឡើងមកផ្លូវចំការដូងក៏ជ្រុលបុកចំក្បាលរថយន្តឡិចស៊ីសពេញទំហឹង បណ្តាលក្បាលរថយន្តឡិចស៊ីសបោកផ្ទុកនឹងខឿនសួនច្បារផ្លូវរងការខូចខាតផ្នែកខាងមុខទាំងស្រុង ចំណែករថយន្តស្ទូចព្យាយាមបើករត់តែត្រូវអ្នកដំណើរដេញទាន់នឹងឃាត់ទុក។
ជុំវិញករណីនេះសមត្ថកិច្ចមូលដ្ឋានបានចុះដល់កន្លែងកើតហេតុនឹងសម្របសម្រួលរវាងភាគីទាំងពីរ ប៉ុន្តែដោយសារម្ចាស់រថយនតឡិចស៊ីសទារសំណងចំនួន៣០០០ដុល្លារ ហើយខាងរថយន្តស្ទូចគ្មានលទ្ធិភាព សមត្ថកិច្ចក៏សម្រេចវាស់វែងអូសយករថយន្តទាំងពីរគ្រឿងយកទៅរក្សាទុកនៅអធិការដ្ឋានខណ្ឌដង្កោ រង់ចាំដោះស្រាយនាពេលក្រោយ៕