Friday, June 22, 2018

សង្ស័យចាញ់ World Cup សិស្សសាលាច្បារអំពៅ ២នាក់ បែកគំនិតចេញឆក់!

អាម៉ាប៉ាប៉ាញ៉ូស

ភ្នំពេញៈ​ ជនសង្ស័យវ័យក្មេង២នាក់ ដែលជាសិស្សសាលា​ច្បារអំពៅ​ផងនោះ ប្រហែលជា ចាញ់ World CUP បានជិះម៉ូតូធ្វើសកម្មភាពឆក់ទូរស័ព្ទពីជនជាតិចិន បានសម្រេច​ តែជិះម៉ូតូរត់មិនរួច​ ត្រូវបាន​សមត្ថកិច្ចដេញឃាត់ខ្លួនបាន នៅម៉ោង១៣និង០៥នាទីថ្ងៃទី២២​ខែមិថុនា​ ឆ្នាំ២០១៨​ នៅតាមបណ្តោយផ្លូវ​ឡើងស្ពានហង្ស​ (ផ្លូវសបិត)​ ស្ថិតក្នុងសង្កាត់ទន្លេបាសាក់​ ខណ្ឌចំការមន​។

សាក្សីដែលឃើញហេតុការណ៍បានប្រាប់ភ្នាក់ងារ​ CAM​ POST​ ដឹងថា​ នៅមុនពេលកើតហេតុ​ មានជនបរទេសមួយក្រុម​ (ជនជាតិចិន)​ មានស្រីមានប្រុសខ្លះស្ពាយកាបូបខ្លះកាន់ទូរស័ព្ទ​ ​បានចេញពីភោជនីយដ្ឋានដើរថ្មើជើង​ តាមបណ្តោយផ្លូវខាងលើ​ បំរុងនឹងឡើងរថយន្ត ​ភ្លាមនោះ ស្រាប់តែលេចមុខជនសង្ស័យ២នាក់ខាងលើជិះម៉ូតូមកពីក្រោយបានធ្វើសកម្មភាពឆក់ទូរស័ព្ទបានសម្រេច​ រួចប្រឹងបើកគេចខ្លួន​ តែលទ្ធផលទទួលបាន​ គឺត្រូវជនជាតិចិនទាំងនោះ ចាប់កន្ទុយម៉ូតូ​ ក្រវីក្រវាត់​ ដួលម៉ូតូ​ ផ្អើលឆោឡោដល់ប្រជាពលរដ្ឋចាប់បានទាំង២នាក់តែម្តង។

សមត្ថកិច្ចបានអោយដឹងថា ជនសង្ស័យទាំង២នាក់ដែលសមត្ថកិច្ចឃាត់ខ្លួនបាន មានឈ្មោះ​ទី១​ ប៉ា​ សុភា​ អាយុ១៦​ឆ្នាំ មុខរបរសិស្សសាលាច្បារអំពៅ និងទី២ឈ្មោះ អៀង​ រតនា អាយុ១៦ឆ្នាំ សិស្សសាលាច្បារអំពៅ ជនសង្ស័យទាំង២នាក់នេះ ស្នាក់នៅម្តុំច្បារអំពៅ​​ ជិះម៉ូតូម៉ាក់ហុងដាឌ្រីមស៊េរីឆ្នាំ២០១៥​ ពណ៌ខ្មៅ​ ដែលមានស្លាកលេខភ្នំពេញ 1DD-2449​ រីឯទូរស័ព្ទឆក់បានសម្រេចនោះ ម៉ាកIPhone 6Plus ពណ៌ ស បណ្តាលអោយបែកអេក្រង់។

បច្ចុប្បន្នក្រោយពេលធ្វើការសាកសួររួចជនសង្ស័យទាំង២នាក់ខាងលើ​នេះ បានឆ្លើយសារភាពនៅចំពោះមុខសមត្ថកិច្ចថា ពួកគេពិតជាបានធ្វើសកម្មភាពឆក់ទូរស័ព្ទដៃ របស់ជនជាតិចិនទាំងនោះ ពិតប្រាកដមែន​ ទើបសមត្ថកិច្ចកសាងសំណុំរឿង បញ្ជូនទៅអធិការដ្ឋាននគរបាលខណ្ឌចំការមន ដើម្បីចាត់ការបន្តតាមនិតិវិធី៕

@Amapapa.News

Feature Ads