ភ្នំពេញៈ ក្មេងស្រីប្រុស៣នាក់បាននាំគ្នាចុះមកលេងទឹកទន្លេបណ្ដាលអោយក្មេងស្រីម្នាក់លង់ទឹកស្លាប់ ហើយក្មេងប្រុស ២នាក់ត្រូវបានគេជួយសង្គ្រោះទាន់ ហេតុការណ៍នេះកើតឡើងកាលពីវេលាម៉ោង១រសៀលថ្ងៃទី១៥ ខែកក្កដាឆ្នាំ២០១៨ នៅមាត់ទន្លេបាសាក់ តាមបណ្ដោយផ្លូវព្រះស៊ីសុវត្ថិ ក្នុងសង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។
សាកសពក្មេងស្រីរងគ្រោះមានឈ្មោះលក្ខណា អាយុ ១១ឆ្នាំ មុខរបរសិស្ស ដែលមានទីលំនៅស្នាក់នៅផ្ទះជួលជាមួយម្ដាយម្តុំផ្សារចាស់ក្នុងសង្កាត់ផ្សារកណ្តាលទី១ ខណ្ឌដូនពេញ មានស្រុកកំណើតនៅស្រុកពារាំង ខេត្តព្រៃវែង។
បើតាមសម្ដីរបស់ម្ដាយក្មេងស្រីរងគ្រោះបានរៀបរាប់ទាំងទឹកភ្នែកថា មុនពេលកើតហេតុកូនស្រីរបស់គាត់បានសុំគាត់មកហូបមីនៅម៉ាត ប៉ុន្តែមិនដឹងជាយ៉ាងម៉េចបានជាកូនស្រីរបស់គាត់បាននាំគ្នាទៅលេងទឹកមាត់ទន្លេបាទនេះ។
តាមប្រភពព័ត៌មានពីកន្លែងកើតហេតុបានដឹងថា មុនពេលកើតហេតុគេបានឃើញក្មេងប្រុសស្រី ៣នាក់បាននាំគ្នាមកលេងទឹកទន្លេ ស្រាប់តែមួយសន្ទុះក្រោយមកក៏បានឃើញក្មេងប្រុសនិងក្មេងស្រីទាំង៣នាក់លង់ទឹក ហើយត្រូវបានទូកនេសាទនៅក្នុងទន្លេជួយស្រង់ប្រុស២ នាក់ឡើងគោក ចំណែកក្មេងស្រីម្នាក់ទៀតបានលិចទៅក្នុងទឹកទន្លេបាត់ ភ្លាមនោះបានជាពលរដ្ឋបាននាំគ្នារាយការណ៍ទៅកម្លាំងសមត្ថកិច្ចមូលដ្ឋានបានចុះមកដល់ទីតាំងកើតហេតុហើយក៏បានជួលទូកទូកនេសាទ ឲ្យចុះជួយរាវរកសាកសពក្មេងស្រី។
ក្រុមអ្នករាវរកសាកសពក្មេងស្រីដែលលិចបាត់នៅក្នុងទន្លេរយៈពេលចំនួនជាង២ ម៉ោង ទើបរកឃើញសាកសពក្មេងស្រីហើយក៏បាននាំគ្នាស្រង់ឡើងមកលើគោក។
ក្រោយពេលរកឃើញសាកសពក្មេងស្រីខាងកុសលវិច័យក្រុងបានចុះមកដល់ទីតាំងកើតហេតុហើយបានធ្វើកោសល្យវិច័យនិងធ្វើកំណត់ហេតុប្រគល់សាកសពទៅឲ្យក្រុមគ្រួសារយកទៅធ្វើបុណ្យនៅឯស្រុក កំណើត៕
