Loading...

Sunday, July 15, 2018

អាជ្ញាធរ និងពលរដ្ឋនៅទូទាំងខេត្តព្រះវិហារ ប្រារព្ធខួបលើកទី១០ នៃការបញ្ចូលប្រាសាទព្រះវិហារ ជាសម្បត្តិបេតិកភណ្ឌពិភពលោក

អាម៉ាប៉ាប៉ាញ៉ូស

ព្រះវិហារៈ អាជ្ញាធរ និងប្រជាពលរដ្ឋទូទាំងខេត្ត និងមកពីបណ្តាខេត្តនានា​ បានប្រារព្ធពិធីអបអរសាទរខួបលើកទី១០នៃការចុះបញ្ជីប្រាសាទព្រះវិហារជាសម្បត្តិបេតិកភណ្ឌពីភពលោកក្រោមអធិបតេយ្យភាព លោក​ មាស សុភា ប្រធានក្រុមការងារថ្នាក់កណ្តាលចុះជួយខេត្តព្រះវិហារ លោក អ៊ុន ចាន់ដា អភិបាលនៃគណអភិបាលខេត្តព្រះវិហារ និងលោក គឹម សេតារា ប្រធានអាជ្ញាធរជាតិប្រាសាទព្រះវិហារ កាលពីព្រឹកថ្ងៃអាទិត្យ ៣កើត ខែទុតិយសាឍ ឆ្នាំច សំរឹទ្ធិស័ក ព.ស ២០១៦២ ត្រូវនិងថ្ងៃទី១៥ ខែកក្កដា ឆ្នាំ ២០១៨នេះ ស្ថិតនៅលើបរិវេណតំបន់ប្រាសាទព្រះវិហារ ក្នុងភូមិមរតកតេជោ ឃុំស្រអែម ស្រុកជាំក្សាន្ត ខេត្តព្រះវិហារ។

នាឱកាសដ៏ឱឡារឹកនោះដែរ លោក​ មាស សុភា ប្រធានក្រុមការងារថ្នាក់កណ្តាល ចុះជួយខេត្តព្រះវិហារ បានមានប្រសាសន៍ឱ្យដឹងថា ប្រាសាទព្រះវិហារជាសម្បត្តិជាតិដ៏មានតម្លៃមិនកាត់ថ្លៃបានឡើយ ដែលបុព្វបុរសដូនតាយើងលោកបានកសាងឡើង ក្នុងការបូជាដល់ព្រះសិវៈ និងបន្សល់ទុកអោយកូនចៅជំនាន់ក្រោយ។

លោក​ក៏បានបន្តឲ្យ​ដឹងថា ក្រោមការយកចិត្តទុកដាក់របស់រាជរដ្ឋាភិបាលកម្ពុជាប្រាសាទព្រវិហារ ត្រូវបានចុះជាសម្បត្តិបេតិកភណ្ឌពិភពលោកកាលពីថ្ងៃទី៧ ខែកក្កដា ឆ្នាំ ២០០៨ ដែលទទួលស្គាល់ដោយអង្គការសហប្រជាជាតិ (UNESCO) និងការពារជាដាច់ខាតនូវការបំពានពីបរទេសដទៃ។

នៅក្នុងពិធីនោះដែរក៏មានការទូងស្គរ បង្ហោះប៉េងប៉ោង និងមានការរំាកម្សាន្តសប្បាយដើម្បីជាការអបអរសាទរនៃការរំលឹកខួប១០ឆ្នាំនៃការបញ្ចូលប្រាសាទព្រះវិហារជាសម្បត្តិបេតិកភណ្ឌពីភពលោកផងដែរ៕

@Amapapa.News

Feature Ads