Saturday, July 21, 2018

បង្រ្កាបហ្គេមបាញ់ត្រីមួយកន្លែង ក្នុងទឹកដីខណ្ឌដូនពេញ ឃាត់ខ្លួនមនុស្ស៤នាក់​

ពិសី

ភ្នំពេញៈ ទីតាំងបើកហ្គេមបាញ់ត្រីមួយកន្លែងទៀត ដែលហ៊ានបើកលេងថ្គើននឹងការហាមឃាត់របស់អាជ្ញាធរនោះ ត្រូវបានកម្លាំងខណ្ឌដូនពេញបានឆ្មក់ចុះបង្រ្កាបជាក់ស្តែងវេលាម៉ោង១៧ល្ងាចថ្ងៃទី២០ ខែកក្កដា ឆ្នាំ២០១៨ នៅចំណុចផ្ទះលេខ១៥ ភូមិ០៨ សង្កាត់ជ័យជំនះ ខណ្ឌដូនពេញ។

សមត្ថកិច្ចបានឲ្យដឹងថា បន្ទាប់ពីទទួលបានសេចក្តីរាយការណ៍ពីប្រជាពលរដ្ឋថា មានការលួចបើកលួចលាក់នូវទីតាំងហ្គេមបាញ់ត្រីនោះ ទើបកម្លាំងបានចុះបង្ក្រាបជាក់ស្តែង ជាលទ្ធផល ដកហូតបានទូហ្គេមបាញ់ត្រីចំនួន២ទូ កៅអី១០ និងកង្ហា២គ្រឿង។

សមត្ថកិច្ចបានបន្តទៀតថា ក្នុងប្រតិបត្តិការបង្រ្កាបទីតាំងលេងហ្គេមបាញ់ត្រីនោះ គឺដោយសារតែបានការសហការពីប្រជាពលរដ្ឋ ផ្តល់ព័ត៌មាន មកខាងកម្លាំងសម្ថកិច្ច ទើបឈានដល់ការចុះបង្រ្កាប ជាក់ស្តែងតែម្តង។

អាជ្ញាធរខណ្ឌដូនពេញបានឲ្យដែរថា ទីតាំងលេងហ្គេមបាញ់ត្រីនេះ គឺអាចបង្កឲ្យ​មានក្មេងទំនើង ក្មេងជក់ថ្មាំញៀន និងបង្កជាបញ្ហាផ្សេងៗ ធ្វើឲ្យ​ប្រជាពរដ្ឋរស់នៅជិតខាងមានការភ័យខ្លាច ហេតុនេះ ទើបឲ្យកម្លាំងគណៈបញ្ជារការចុះបង្រ្កាបទីតាំងនោះ។

ចំណែកលោកសុខ ពេញវុធ អភិបាលខណ្ឌដូនពេញ ក៏ធ្លាប់មានប្រសាសន៍​ថា លោកនឹងបន្តបង្ក្រាបយ៉ាងសកម្មចំពោះល្បែងស៊ីសង់គ្រប់ប្រភេទ ជាពិសេសល្បែងហ្គេមបាញ់ត្រីនេះ ដែលធ្វើឲ្យ​ពង្វក់​អារម្មណ៍ក្មេងៗសិស្សសាលាភ្លេចការរៀនសូត្រនោះ។

លោកអភិបាលក៏បានសុំអោយប្រជាពលរដ្ឋនៅក្នុងមូលដ្ឋានខណ្ឌដូនពេញទាំងអស់ជួយសហការជាមួយអាជ្ញាធរ នឹងផ្ដល់ព័ត៌មានចំពោះទីតាំងល្បែងហ្គេមបាញ់ត្រីណា ដែលនៅបន្តបើកដោយលួចលាក់ទៀតនោះរដ្ឋបាលខណ្ឌ នឹងចាត់វិធានការបង្ក្រាបឲ្យទាន់ពេលវេលាតែម្តង។

ក្រោយធ្វើកំណត់ហេតុដកហូតសម្ភារៈ​ខាងលើ ត្រូវបានយកមករក្សាទុកនៅសាលាខណ្ឌដូនពេញ បណ្តោះអាសន្ន ដើម្បីមានវិធាកាបន្ត។ ចំណែកអ្នកលេង និងអ្នកមើលការខុសត្រូវចំនួន៤នាក់ មានប្រុស៣នាក់ និងស្រីម្នាក់ បានធ្វើការអប់រំនៅនឹងកន្លែងឲ្យវិលត្រឡប់ទៅវិញ៕

@Amapapa.News

Feature Ads