Tuesday, July 17, 2018

នគរបាលកម្ពុជា បង្ហាញមុខចិន៥នាក់ មុនបណ្តេញចេញពីប្រទេស ក្រោយបង្កហិង្សាប៉ះពាល់សង្គមខ្មែរ

ពិសី

ភ្នំពេញៈ ជនជាតិចិន ចំនួន៥នាក់ ត្រូវបានកម្លាំងអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ធ្វើសន្និសីទកាសែតបង្ហាញមុខ មុននឹងបណ្តេញចេញពីព្រះរាជាណាចក្រកម្ពុជា ឲ្យវិលត្រឡប់ទៅប្រទេសកំណើតបឭវិញ ក្រោយពីជនជាតិចិនទាំង៥នាក់នោះ បង្កហិង្សាដោយចេតនា អុកឡុក បង្កើតឲ្យមានភាពចលាចល ប៉ះពាល់សណ្តាប់ធ្នាប់សាធារណៈ កាលពីថ្ងៃទី១៣ ខែកក្កដា ឆ្នាំ២០១៨កន្លងមក នៅខេត្តព្រះសីហនុ ។

តាមសមត្ថកិច្ចបានឲ្យដឹងថា ជនជាតិចិនទាំង៥នាក់ ក្រោយពីកម្លាំងសមត្ថកិច្ចស្នងការខេត្តព្រះសីហនុចាប់ខ្លួនបាន បន្ទាប់ពីពួកគេបង្កការអុកឡុក ដោយចេតនា ខូចខាតទាំងទ្រព្យសម្បត្តិសណ្តាប់ធ្នាប់ ត្រូវសមត្ថកិច្ចខេត្តព្រះសីហនុ ប្រគល់ឲ្យអគ្គនាយកដ្ឋានអន្តោប្រវេសន៍ ហើយមកដល់រសៀលថ្ងៃទី១៧ ខែកក្កដា ឆ្នាំ២០១៨នេះ ត្រូវបានលោក ឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តន៍នីតិវិធី នៃអគ្គនាយកដ្ឋានអន្តោប្រវេសន៍ ក្រោមការឯកភាពពីក្រសួងមហាផ្ទៃ និងសម្របសម្រួលផ្លូវច្បាប់ ដោយព្រះរាជអាជ្ញារងអមសាលាដំបូងរាជធានីភ្នំពេញផងនោះ បានធ្វើសន្និសីទកាសែត បង្ហាញមុខជនជាតិចិនទាំង៥នាក់ មុននឹងបណ្តេញចេញពីព្រះរាជាណាចក្រកម្ពុជា នារសៀលថ្ងៃទី១៧ ខែកក្កដា ឆ្នាំ២០១៨ ឲ្យវិលត្រឡប់ទៅប្រទេសដើមវិញ ។

លោកបន្តទៀតថា ជនជាតិចិនទាំង៥នាក់នេះ ក្រោយពីបណ្តេញចេញឲ្យវិលទៅប្រទេសដើមវិញ ហើយមិនអាចវិលត្រឡប់មកប្រទេសកម្ពុជាសារជាថ្មីទៀតឡើយ ។

ក្នុងឱកាសនេះ អគ្គនាយកដ្ឋានអន្តោប្រវេសន៍ សូមសំណូមពរដល់សមត្ថកិច្ចពាក់ព័ន្ធ ចូលរួមសហការផ្តល់ព័ត៌មាន រាល់ជនបរទេសដែលលួចស្នាក់នៅ និងប្រព្រឹត្តបទល្មើស ដល់សមត្ថកិច្ចដែលនៅជិតបំផុត ដើម្បីទប់ស្កាត់ការប្រព្រឹត្តបទល្មើស របស់ជនបរទេសទាំងនោះ៕

@Amapapa.News

Feature Ads