សម្តេចសតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ថ្លែងថាមិនទាន់សម្លឹងឃើញគណបក្សណាមួយដែលអាចក្លាយជាគូប្រកួតជាមួយគណបក្សប្រជាជនកម្ពុជាសម្រាប់ការបោះឆ្នោតក្នុងអាណតិ្តនេះ។ សម្តេចសង្ឃឹមយ៉ាងខ្លាំងថា នឹងឈ្នះការបោះឆ្នោត ហើយបានដឹកនាំប្រទេសបន្តទៀត។
ការថ្លែងបែបនេះធ្វើឡើង នៅព្រឹកថ្ងៃពុធ ៧រោច ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៤ ខែកក្កដា ឆ្នាំ២០១៨នេះ ក្នុងកម្មវិធិជួបសំណេះសំណាលសួរសុខទុក្ខបងប្អូនកូនក្មួយកម្មករកម្មការិនីសរុបប្រមាណ២៧,៤២៧នាក់ មកពីរោងចក្រចំនួន១៨ នៅក្នុងខេត្តកណ្តាល។
សម្តេចតេជោថ្លែងទាំងទឹកមុខរីករាយថា៖ពូ មិនជឿថាមានគណបក្សណាដែលប្រជែងយកឈ្នះគណបក្សប្រជាជនកម្ពុជា អាចយកឈ្នះពូនៅក្នុងកាលៈទេសៈនេះបានទេ ព្រោះប្រជាជនត្រូវការសន្តិភាព ត្រូវការអភិវឌ្ឍ ត្រូវការ ហ៊ុនសែន រួមជាដំណើរមួយតទៅទៀត។
ការបោះឆ្នោតអាណត្តិទី៦ មានគណបក្សនយោបាយ២០ ចូលរួមប្រកួតប្រជែងនៅថ្ងៃទី២៩ ខែកក្កដា ឆ្នាំ២០១៨។ សូមរំលឹកថាអតីតគណបក្សសង្គ្រោះជាតិដែលជាគណបក្សប្រឆាំងធំជាងគេ និងដៃគូប្រកួតរបស់គណបក្សប្រជាជនកម្ពុជា ត្រូវបានតុលាការកំពូលរំលាយចោល ហើយមិនបានចូលរួមក្នុងការបោះឆ្នោតនេះបានឡើយ។