Sunday, July 22, 2018

បុរសម្នាក់ សន្លប់ស្កូកក្នុងថ្លុកឈាម ខណៈប្ដីប្រពន្ធមានផ្ទៃពោះ២នាក់ របួសស្រាល ក្រោយអាគុបបុកអាហ្វីណូ

ពិសី

ភ្នំពេញៈ បុរសម្នាក់ សន្លប់ស្ដូកស្ដឹង ត្រូវបានរថយន្តសង្គ្រោះបន្ទាន់ដឹកទៅសង្គ្រោះភ្លាមៗ បន្ទាប់ពីជិះម៉ូតូមួយគ្រឿង​ ទៅបុកពីក្រោយម៉ូតូមួយគ្រឿងទៀតរបស់ប្ដីប្រពន្ធ២នាក់ ខណៈកំពុងជិះឌុបគ្នា បណ្ដាលឲ្យដួលរលាតដៃជើង និងចង្កេះ។ ចំណែកបុរសខាងលើ បានបោកក្បាលនឹងថ្នល់របួសធ្ងន់ដេកក្នុងថ្លុកឈាម។

គ្រោះថ្នាក់ចរាចរណ៍ដ៏រន្ធត់នេះ បានកើតឡើងនៅវេលាម៉ោង៩៖២០នាទីយប់ ថ្ងៃទី​២១ ខែកក្កដា ​ឆ្នាំ២០១៨នេះ លើកំណាត់ផ្លូវជាតិលេខ២ ត្រង់ចំណុចមុខវត្តចាក់អង្រែក្រោម ភូមិទួលរកា សង្កាត់ចាក់អង្រែក្រោម​ ខណ្ឌមានជ័យ​ រាជធានីភ្នំពេញ​។

ប្រជាពលរដ្ឋឃើញហេតុការណ៍ ​ប្រាប់ភ្នាក់ងារ ខេម ប៉ុស្តិ៍ ឲ្យដឹងថា នៅមុនពេលកើតហេតុ​ គេឃើញបុរសម្នាក់ ជិះម៉ូតូមួយគ្រឿង តែម្នាក់ឯង ម៉ាក ហុងដា គុប ពណ៌ខៀវ ពាក់ស្លាកលេខ ភ្នំពេញ​ 1BJ-4129 ធ្វើដំណើរតាមផ្លូវជាតិលេខ២ ពីត្បូងទៅជើងក្នុងល្បឿនលឿនគួរសម។ លុះមកដល់កន្លែងកើតហេតុ ក៏បានជ្រុលទៅបុកពីក្រោយម៉ូតូ FINO មួយគ្រឿង ពណ៌ឈាមជ្រូក ពាក់ស្លាកលេខ ភ្នំពេញ​ 1AD-6361 ដែលជិះដោយប្ដីប្រពន្ធ២នាក់ កំពុងធ្វើដំណើរស្របទិសគ្នា បណ្ដាលឲ្យ២នាក់ប្ដីប្រពន្ធរងរបួសរលាត់ដៃជើង និងចង្កេះតិចតួច។ ចំណែកបុរសខាងលើ បានបោកក្បាលនឹងថ្នល់របួសធ្ងន់ដេកក្នុងថ្លុកឈាម សន្លប់ស្ដូកស្ដឹងតែម្ដង ទើបបង្កឲ្យមានការភ្ញាក់ផ្អើលដល់ប្រជាពលរដ្ឋ និងអ្នកធ្វើដំណើរឆ្លងកាត់ចោមរោមមើលយ៉ាងច្រើន តែមិនអាចជួយអ្វីបានក្រៅពីជួយទាក់ទងហៅរថយន្តសង្គ្រោះបន្ទាន់ប៉ុណ្ណោះ។

សមត្ថកិច្ចប៉ុស្តិ៍ចាក់អង្រែក្រោម ឲ្យដឹងថា ជនរងគ្រោះ​កំពុងរង់ចាំទាក់ទងស្វែងរកក្រុមគ្រួសារសិន ដោយនៅមិនទាន់ស្គាល់​អត្តសញ្ញាណ​នៅឡើយទេ​។

​ក្រោយកើតហេតុសមត្ថកិច្ចជំនាញផ្នែកចរាចរណ៍ ចុះមកធ្វើការវាស់វែង និងយកទៅរក្សាទុកនៅអធិការដ្ឋាននគរបាលខណ្ឌមានជ័យ ដើម្បីរង់ចាំដោះស្រាយគ្នាពេលក្រោយ៕

@Amapapa.News

Feature Ads