ភ្នំពេញៈ ពលរដ្ឋខ្មែរ ចំនួន១៦នាក់ ដែលត្រូវបានស្ថានតំណាងកម្ពុជា ជួយចេញពីប្រទេសចំនួន៤មាន ប្រទេសចិន ចំនួន ៨នាក់ ប្រទេសវៀតណាម៤នាក់ ប្រទេសថៃ៣នាក់ និង សាធារណរដ្ឋអារ៉ាប់ អេហ្សិប ម្នាក់។ នេះបើតាមការអោយដឹង ពីលោក ជុំ សុន្ទរី អ្នកនាំពាក្យ ក្រសួងការបរទេស និងសហប្រតិបត្តការអន្តរជាតិ នៅថ្ងៃទី៩ ខែកក្កដា ឆ្នាំ២០១៨៕
ស្ថានទូត បានផ្តល់កន្លែងស្នាក់នៅ និងអាហារបរិភោគ ព្រមទាំងរៀបចំឯកសារធ្វើដំណើរដល់ស្ត្រីរងគ្រោះទាំង៧នាក់ ហើយពួកគេបានមកដល់កម្ពុជាវិញ នៅថ្ងៃទី០៤ និងទី០៥ ខែ កក្កដា ឆ្នាំ២០១៨ ។
ដោយឡែក ស្ថានឯកអគ្គរាជទូតកម្ពុជាប្រចាំប្រទេសវៀតណាម បានរៀបចំមាតុភូមិនិវត្តន៍របស់ស្ត្រីខ្មែរចំនួន៤នាក់ ដែលត្រូវបានមេខ្យល់បោកបញ្ឆោតបម្រុងយកទៅរៀបការជាមួយបុរសជនជាតិចិន នៅប្រទេសចិន។ ស្ត្រីរងគ្រោះទាំងនោះ មកពីខេត្តកណ្តាល កំពង់ចាម និងត្បូងឃ្មុំ ត្រូវបានមេខ្យល់នាំធ្វើដំណើរពីកម្ពុជាទៅដល់វៀតណាម នៅចុងខែមិថុនា ហើយបម្រុងបន្តដំណើរឆ្លងកាត់ព្រំដែនទៅប្រទេសចិន តែត្រូវបានអាជ្ញាធរមានសមត្ថកិច្ចវៀតណាម ជួយសង្គ្រោះទាន់ពេល។
ស្ថានទូតបានផ្តល់កន្លែងស្នាក់នៅ និងអាហារបរិភោគដល់ស្ត្រីទាំង៤នាក់ ហើយបានរៀបចំមាតុភូមិ-និវត្តន៍មកកម្ពុជាវិញ នៅថ្ងៃទី ០៤ និងថ្ងៃទី ០៧ ខែ កក្កដា ឆ្នាំ២០១៨ ។
ស្ថានឯកអគ្គរាជទូតកម្ពុជាប្រចាំប្រទេសថៃ បានសហការជាមួយអាជ្ញាធរថៃ រៀបចំមាតុភូមិ-និវត្តន៍របស់អនីតិជនខ្មែរចំនួន៣នាក់ (ស្រី) មានអាយុពី១៣ឆ្នាំដល់១៦ឆ្នាំ មកពីខេត្តបន្ទាយមានជ័យ ដែលទទួលរងគ្រោះដោយការជួញដូរមនុស្ស តាមច្រកទ្វារអន្តរជាតិប៉ោយប៉ែត នៅថ្ងៃទី០៤ ខែ កក្កដា ឆ្នាំ២០១៨។
ស្ថានឯកអគ្គរាជទូតកម្ពុជាប្រចាំសាធារណរដ្ឋអារ៉ាប់អេហ្ស៊ីប បានសម្របសម្រួលជួយរៀបចំមាតុភូមិនិវត្តន៍របស់ស្ត្រីបម្រើការជាមេផ្ទះខ្មែរ១នាក់ ដែលពុំអាចទ្រាំទ្រការងារនៅអារ៉ាប៊ីសាអូឌីត មកដល់កម្ពុជាវិញ នៅព្រឹកថ្ងៃទី០៤ ខែកក្កដា ឆ្នាំ២០១៨។
ស្ថានអគ្គកុងស៊ុលកម្ពុជាប្រចាំទីក្រុងស៊ីអាន ប្រទេសចិន បានធ្វើអន្តរាគមន៍ និងរៀបចំមាតុភូមិ-និវត្តន៍ស្ត្រីខ្មែរ១នាក់ ដែលចាញ់បោកមេខ្យល់ និងត្រូវបានអាជ្ញាធរចិនឃាត់ខ្លួនពីបទរស់នៅខុសច្បាប់។ ស្ត្រីរងគ្រោះបានមកដល់កម្ពុជាវិញ នៅថ្ងៃទី ០៣ ខែ កក្កដា ឆ្នាំ ២០១៨ ។