ភ្នំពេញៈ រថយន្តមួយគ្រឿង បើកបរដោយបុរសជនជាតិចិនស្រវឹងស្រា ក្នុងល្បឿនលឿន មកដល់ចំណុចផ្លូវបំបែកជាបួន មិនគោរពភ្លើងស្តុបជ្រុលបុកម៉ូតូហុងដាឌ្រីមពីចំហៀងពេញទំហឹង អូសជាង៣០ម៉ែត្រ បណ្តាលឲ្យមនុស្ស២នាក់ រងរបួសធ្ងន់ស្រាល។
គ្រោះថ្នាក់ចរាចរណ៍ខាងលើនេះ បានកើតឡើងកាលពីវលាម៉ោង១២និង២០នាទីរំលងអធ្រាត្រឈានចូលថ្ងៃទី២០ ខែកក្កដា ឆ្នាំ២០១៨ នៅចំណុចស្តុបអគារ៤២ជាន់ តាមបណ្តោយផ្លូវព្រះមុន្នីវង្ស ស្ថិតក្នុងសង្កាត់បឹងព្រលឹត ខណ្ឌ៧មករា រាជធានីភ្នំពេញ។
អ្នកឃើញហេតុការន៍ បានឲ្យដឹងថា មុនពេលកើតហេតុ គេឃើញយុវជន២នាក់ ជិះម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ ក្រចេះ1E-4487 ធ្វើដំណើរតាមបណ្តោយផ្លូវព្រះសីហនុ ក្នុងទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែមានរថយន្តម៉ាកហាយឡែនឌ័រ ពណ៌ស្លែ ពាក់ស្លាកលេខភ្នំពេញ 2AR-5563 បើកបរដោយបុរសម្នាក់ជាជនជាតិចិនទាំងស្ថានភាពស្រវឹង ធ្វើដំណើរតាមបណ្តោយផ្លូវព្រះមុន្នីវង្ស ក្នុងទិសដៅពីជើងទៅត្បូងក្នុងល្បឿនលឿនដោយមិនបានបន្ថយល្បឿន ក៏ជ្រុលបុកម៉ូតូពីចំហៀងពេញទំហឹង ហើយអូសម៉ូតូជាប់ក្រោមរថយន្តជាង៣០ម៉ែត្រទើបឈប់ ធ្វើឲ្យអ្នកជិះម៉ូតូរងរបួសធ្ងន់ស្រាលចំណែកម៉ូតូនិងរថយន្ត រងការខូចខាតយ៉ាងដំណំ។ ភ្លាមនោះជនរងគ្រោះក៏ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ។
ក្រោយកើតហេតុសមត្ថកិច្ចចុះមកដល់ចំណុចកើតហេតុ និងឃាត់ម្ចាស់រថយន្តប្រគល់អោយជំនាញចរាចរណ៍ ធ្វើការវាស់វែងយករថយន្ដ និងម៉ូតូទៅរក្សាទុកនៅអធិការដ្ឋាននគរបាលខណ្ឌ៧មករា ដើម្បីរង់ចាំដោះស្រាយតាមផ្លវច្បាប់៕
