ក្នុងរយៈពេលត្រឹមជាងមួយសប្តាហ៍ ពលករខ្មែរប្រមាណជាង ១ ០០០នាក់ដែលបានចូលស្នាក់នៅ និងបម្រើការងារដោយខុសច្បាប់ ត្រូវបានកម្លាំងតម្រួតអន្តោប្រវេសន៍ថៃចាប់បញ្ជូនត្រឡប់មកកម្ពុជាវិញតាមច្រកអន្តរជាតិប៉ោយប៉ែត ខេត្តបន្ទាយមានជ័យ។ នេះជាការបញ្ជាក់របស់លោកស្រី ស៊ិន ណាំយ៉ុង អនុប្រធានគណៈកម្មការសម្របសម្រួលទទួលពលករពីប្រទេសថៃប្រចាំច្រកប៉ោយប៉ែត។
ការបញ្ជូលពលករខ្មែរត្រឡប់មកវិញនេះ ក្រោយពីរដ្ឋាភិបាលប្រទេសថៃបានប្រកាសបិទការផ្ដល់សុពលភាពនូវឯកសារការងារ និងធ្វើដំណើរស្របច្បាប់សម្រាប់ពលករបរទេសទាំងអស់កាលពីចុងខែមិថុនា ឆ្នាំ២០១៨។
លោកស្រី ស៊ិន ណាំយ៉ុង បានថ្លែងថា៖ ក្នុងឯកសារបញ្ជូនពលកររបស់ក្រុមតម្រួតអន្តោប្រវេសន៍ថៃនោះបានព្រមានថានឹងចាត់វិធានការតឹងរ៉ឹងបំផុតតាមផ្លូវច្បាប់ប្រឆាំងនឹងពលករចំណាកស្រុកទាំងនោះ ប្រសិនបើពួកគេត្រូវបានចាប់ខ្លួនសារជាថ្មីក្នុងបទល្មើសដូចគ្នានេះ។
តំណាងពលករខ្មែរម្នាក់ដែលធ្វើការនៅប្រទេសថៃ បានឱ្យដឹងថាពលករធ្វើការខុសច្បាប់នៅទីក្រុងបាងកកជាច្រើននាក់ បានត្រឡប់ទៅប្រទេសកម្ពុជាវិញយ៉ាងប្រញាប់ប្រញាល់តាំងពីថ្ងៃទី២៩ មិថុនា ដោយសារខ្លាចសមត្ថកិច្ចថៃចាប់ដាក់គុក មុននឹងបញ្ជូនត្រឡប់ទៅស្រុកកំណើត។
ចំណែកឯពលករដែលធ្វើការខុសច្បាប់នៅតំបន់មាត់សមុទ្ររបស់ថៃម្នាក់ទៀត បានថ្លែងថាកន្លែងធ្វើការរបស់ពួកគាត់មានពលករខ្មែរប្រមាណ ៤០នាក់ គឺសព្វថ្ងៃពួកគាត់ធ្វើការទាំងភិតភ័យ ហើយម្នាក់ៗមិនហ៊ានចេញដើរទៅណាឆ្ងាយពីកន្លែងធ្វើការនោះទេ។
សូមបញ្ជាក់ថាច្បាប់របស់ក្រសួងការងារប្រទេសថៃ ដែលបានចាប់អនុវត្តន៍កាលពីថ្ងៃទី០១ ខែកក្កដា ឆ្នាំ២០១៨ ចែងថាពលករដែលធ្វើការមិនមានប័ណ្ណអនុញ្ញាតការងារ ឬធ្វើការក្រៅពីសិទ្ធិដែលអាចធ្វើបាន នឹងត្រូវទទួលការផាកពិន័យពី ៥ពាន់ទៅ៥ម៉ឺនបាត ឬប្រមាណពី ១៧០ ទៅ១ ៧០០ដុល្លារអាមេរិក ហើយពលករនឹងត្រូវបញ្ជូនត្រឡប់ទៅប្រទេសកំណើតវិញ ហើយហាមឃាត់មិនឱ្យធ្វើការនៅប្រទេសថៃ រយៈពេល ០២ឆ្នាំ ដោយគិតចាប់ពីថ្ងៃទទួលពិន័យ។
យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថាពលករខ្មែរប្រមាណ ១លាន ៧ ម៉ឺននាក់បានស្នាក់នៅ និងបំពេញការងារនៅក្នុងប្រទេសថៃ។ នៅក្នុងសន្និបាតបូកសរុបការងារកាលពីថ្ងៃទី១៤ ខែមីនា ឆ្នាំ ២០១៨ ក្រសួងការងារបានឲ្យដឹងថា រាជរដ្ឋាភិបាលកម្ពុជាបានផ្ដល់សេវាជួយស្វែងរកការងារធ្វើនៅក្រៅប្រទេសជូនប្រជាពលរដ្ឋបានជាង ១ លាន ២ សែននាក់។
បច្ចុប្បន្ន ពលករខ្មែរដែលកំពុងធ្វើការងារនៅប្រទេសថៃមានជាង១លាននាក់ ក្នុងនោះពលករមួយចំនួនធ្វើការងារខុសច្បាប់។