លោក ណាជីប រ៉ាសាក់ (Najib Razak) អតីតនាយករដ្ឋមន្ត្រី ប្រទេសម៉ាឡេស៊ី ត្រូវបានចាប់ខ្លួនហើយកាលពីយប់មិញ (យប់ថ្ងៃទី៤ ខែមិថុនា ឆ្នាំ២០១៨ ) នៅក្នុងវិមានដ៏ស្កឹមស្កៃរបស់គាត់ ពាក់ព័ន្ធទៅនឹងបទល្មើសអំពើពុករលួយទ្រង់ទ្រាយធំ ជុំវិញការគ្រប់គ្រងមូលនិធិរបស់រដ្ឋ (1MDB)។
ការចាប់ខ្លួននេះត្រូវបានធ្វើឡើងមិនដល់ ២ខែផងក្រោយ លោក ណាជីប បានចាញ់ឆ្នោត។ មុននឹងឈានដល់ការចាប់ខ្លួននេះ គេឃើញមានការផ្លាស់ប្តូរថ្នាក់ដឹកនាំនៃស្ថាប័នប្រឆាំងពុករលួយ អគ្គសវនករ និងរដ្ឋមន្ត្រីក្រសួងយុត្តិធម៌ ដែលកន្លងមកបានឃុបឃឹតគ្នាជាមួយលោក ណាជីប លាក់បាំង និងការពារគ្នាទៅវិញទៅមកដើម្បីបានផលចំណេញសម្រាប់ខ្លួន និងរួចផុតពីសំណាញ់ច្បាប់។
ក្នុងពេលជាមួយគ្នានេះដែរ រដ្ឋាភិបាលម៉ាឡេស៊ីកំពុងតែរៀបចំសំណុំបែបបទដើម្បីប្រមូលយកទ្រព្យសម្បត្តិពាក់ព័ន្ធនឹងអំពើពុករលួយ ដែលមានតម្លៃប្រហែលជាងបួនពាន់លានដុល្លា (4 billions USD) នៅឯបរទេសត្រឡប់ចូលមកជាទ្រព្យសម្បត្តិរដ្ឋាភិបាលម៉ាឡេស៊ីវិញ។
នាយករដ្ឋមន្ត្រីថ្មី លោក មហាធៀ មហាម៉ាត់ ធ្លាប់ផ្តល់បទសម្ភាសន៍ជាមួយទីភ្នាក់ងារព័ត៌មាន Bernama ថា ណាជីបនឹងត្រូវនាំមកតុលាការឆាប់ៗ មនុស្សជាតិបានបង្ហាញការងឿងឆ្ងល់ហេតុអ្វីបានជាមិនមានការចាត់វិធានការ ហើយ ទុកឱ្យលោក ណាជីប រស់នៅស្រួលបែបនេះ។
លោក មហាធៀ មហាម៉ាត់ ដែលមានអាយុ៩២ឆ្នាំ ទើបតែជាប់ឆ្នោតថ្មីៗបន្ថែមថា៖ ខ្ញុំចង់បញ្ជាក់ថាការនាំសុំណុំរឿងនេះមកតុលាការវាចាំបាច់ត្រូវមានភស្តុតាងគ្រប់គ្រាន់។ ដូច្នេះយើងមិនបរាជ័យពេលចាប់ផ្តើមដំណើរការចោទប្រកាន់ជាផ្លូវការ។
លោក ព្រាប កុល នាយកប្រតិបត្តិអង្គការតម្លាភាពកម្ពុជា បានបង្ហាញអារម្មណ៍ថា៖ គួរឱ្យសង្វេកណាស់ អ្វីៗត្រូវរលាយអស់មួយពព្រិចភ្នែក ខូចកេរ្ត៍ឈ្មោះដល់ក្រុមគ្រួសារ និងថែមទាំងជាប់គុកទៀត។ លើលោកនេះគ្មានអ្វីស្ថិត ស្ថេរ និងអមត:ឡើយ ដូច្នេះមេដឹកនាំទាំងឡាយនៅលើពិភពលោក គួរជៀសវាងដើរលើគន្លងនយោបាយគាបសង្កត់ ធ្វើទុក្ខបុកម្មេញគូប្រជែង និងព្រព្រឹត្តិអំពើពុករលួយគ្រប់រូបភាព។