សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានណែនាំមិនឱ្យអង្គភាពណាមួយ ប្រើប្រាស់រថយន្តស្លាកលេ ខ.ម (ខេមរភូមិន្ទ) សម្លៀកបំពាក់ និងសម្ភារយោធា ដើម្បីចូលរួមបម្រើឱ្យយុទ្ធនាការ ឃោសនាបោះឆ្នោតរបស់គណបក្សនយោបាយឡើយ។
សម្ដេច ទៀ បាញ់ បានប្រសាសន៍បែបនេះ ធ្ចើឡើងនៅក្នុងកិច្ចប្រជុំបូកសរុបលទ្ធផលការងារឆមាសទី១ និងលើកទិសដៅអនុវត្តឆមាសទី២ ឆ្នាំ២០១៨ របស់ក្រសួងការពារជាតិ ដែលប្រព្រឹត្តទៅនៅព្រឹកថ្ងៃទី០៣ ខែកក្កដា ឆ្នាំ២០១៨ នេះ។
នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ បានលើកឡើងថា វិធានការ គឺអនុវត្តទៅតាមច្បាប់ស្តីពីការបោះឆ្នោតជាតិ ជ្រើសតាំងតំណាងរាស្រ្ត របស់ព្រះរាជាណាចក្រកម្ពុជា។
ការប្រកាសបែបនេះស្របពេលដែលយុទ្ធនាការឃោសនាបោះឆ្នោតនឹងចាប់ផ្តើមពីថ្ងៃទី៧ ដល់ថ្ងៃទី២៧ ខែកក្កដា ឆ្នាំ២០១៨។
