Monday, July 16, 2018

តារាចម្រៀងជើងចាស់ ម៉ារ៉ា ប៊ុណ្ណា បើករថយន្តទីកូ បុកបង្កាន់ដៃស្ពានអាកាសស្ទឹងមានជ័យ

ពិសី

ភ្នំពេញៈ តារាចំរៀងជើងចាស់ម្ចាស់បទ ដីថ្លៃប្រឡៃស្នេហ៍ លោក ម៉ារ៉ា ប៊ុណា បានបើករថយន្តម៉ាក TICO មួយគ្រឿង ដែលទើបនិងទិញឡើងពណ៌ទឹកមាស បំរុងថត MV បទថ្មីរបស់ខ្លួន តែក៏ងងុយដេកងោកមួយផាំង ក៏ជ្រុលចង្កូតទៅបុកបង្កាន់ដៃស្ពានអាកាសស្ទឹងមានជ័យ បណ្តាលឲ្យរងការខូចខាតយ៉ាងដំណំ កាលពីវេលាម៉ោង១៖៥០នាទីរំលងអធ្រាត្រ ឈានចូលថ្ងៃទី១៦ ខែកក្កដា ឆ្នាំ២០១៨ ត្រង់ចំណុចគល់ស្ពានអាកាសស្ទឹងមានជ័យផ្នែកខាងលិច តាមបណ្តោយផ្លូវ២៧១ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ ។

បើតាមសម្តីពីតារាចំរៀងជើងចាស់ លោក ម៉ារ៉ា ប៊ុណា បានឲ្យដឹងថា នៅមុនពេលកើតហេតុ គាត់បានបើកបររថយន្តមួយគ្រឿង ពណ៌ស ឡើងពណ៌ទឹកមាស ពាក់ស្លាកលេខ ច-៧១២៤ ភព១ ដោយធ្វើដំណើរតាមបណ្តោយផ្លូវ២៧១ ក្នុងទិសដៅមកពីវិទ្យាល័យជាស៊ីមសាមគ្គី ឆ្ពោះទៅស្ពានអាកាសស្ទឹងមានជ័យ លុះមកដល់ចំណុចកើតហេតុ ដោយសារតែគាត់ងងុយដេកខ្លាំងពេក ក៏ងោកមួយផាំង ក៏រេចង្កូតទៅបុកបង្កាន់ដៃស្ពានអាកាសស្ទឹងមានជ័យ បណ្តាលឲ្យរថយន្តក្រឡាប់ផ្ងារជើង និងរងការខូចខាតដាច់ក្រឡេកង់ខាងមុខចំហៀងខាងស្តាំ ចំណែកឯបង្កាន់ដៃស្ពាន គឺពុំមានរងការខូចខាតនោះទេ។ ភ្លាមៗនោះតារាចំរៀងជើងចាស់ខាងលើ ក៏បានហៅប្រជាពលរដ្ឋដែលនៅក្បែរៗនោះ ឲ្យជួយរុញរថយន្តរបស់ខ្លួន យកទៅដាក់នៅលើចិញ្ចើមផ្លូវ រួចក៏ឡើងជិះរថយន្តមួយគ្រឿងទៀតចេញទៅបាត់ទៅ ។

បើតាមសម្តីពីមិត្តភក្តីរបស់តារាចំរៀងជើងចាស់ខាងលើម្នាក់ សូមមិនបញ្ចេញឈ្មោះ បានឲ្យដឹងថា រថយន្តទិកកូខាងលើនេះ គឺលោក ម៉ារ៉ា ប៊ុណា ទើបតែទិញពីតារាចំរៀងជើងចាស់ម្នាក់ទៀត គឺនាយ ផ្លាក់ទីន បំណងយករថយន្តខាងលើមកថត MV បទថ្មីរបស់គាត់​ ដែលគ្រោងនិងចេញក្នុងពេលឆាប់ៗនេះ គឺបទ" TICO បង់រំលួស "។ តែមិនទាន់និងបានថតផង បែរជាទៅជួបគ្រោះថ្នាក់ចរាចរណ៍​ បណ្តាលឲ្យខូចខាតរថយន្តយ៉ាងដំណំបាត់ទៅហើយ ។

ក្រោយពេលកើតហេតុ មិត្តភក្តីរបស់តារាចំរៀងជើងចាស់ខាងលើនោះ បានទាក់ទងហៅរថយន្តស្ទូចមកធ្វើការស្ទូចយករថយន្តខាងលើចេញទៅបាត់ទៅ ដោយមិនឃើញមានសមត្ថកិច្ចមូលដ្ឋាន ចុះមកអន្តរាគមន៍នោះទេ៕

@Amapapa.News

Feature Ads