បាត់ដំបងៈ បុរសវ័យជាង៥០ឆ្នាំម្នាក់ បានសម្រេចចិត្តធ្វើអត្តឃាតចង.កសម្លាប់ខ្លួនឯង ព្រោះតែជំពាក់បំណុលធនាគារអម្រឹតចំនួន៦០០០០ដុល្លារ។
សាកសពត្រូវបានគេប្រទះឃើញ កាលពីវេលាម៉ោង៧ព្រឹកថ្ងៃទី១ ខែកក្កដា ឆ្នាំ២០១៨ នៅចំណុច ដីបារាំងស្ថិតក្នុងភូមិព្រៃធំ ឃុំ ឃ្លាំងមាស ស្រុកបវេល ខេត្តបាត់ដំបង។
សមត្ថកិច្ច បានឲ្យដឹងថា សាកសព ឈ្មោះ មាស អៀង ភេទប្រុស អាយុ៥៨ឆ្នាំ រស់នៅភូមិ-ឃុំកើតហេតុ។
តាមការបំភ្លឺរបស់កូនសាកសពឈ្មោះ មាស សុខហេង ភេទស្រី អាយុ២៣ឆ្នាំ បានបញ្ជាក់ថា ឪពុករបស់នាង តែងតែពិបាកចិត្ត ហើយពោលប្រាប់កូនៗថា បើគាត់យ៉ាងម៉េចៗទៅឲ្យលក់ដីសងគេចុះ។ កូនស្រីបន្តថា តាមនាងដឹងក្រុមគ្រួសាររបស់នាងជំពាក់លុយធនាគារអម្រឹត និងសមាគមសន្សំប្រាក់ ឃុំក្តុលតាហែន សរុបចំនួន៦០០០០ដុល្លារ (ប្រាំមួយម៉ឺនដុល្លារអាមេរិក) ទើបបានឪពុករបស់នាងពិបាកចិត្តគ្មានលុយសងធនាគារ ក៏សម្រេចចិត្តធ្វើអត្តឃាតខ្លូនតែម្ដង។
ក្រោយកើតហេតុ កម្លាំងជំនាញអធិការដ្ឋាននគរបាលស្រុក បានចុះទៅដល់កន្លងកើតហេតុ ពិនិត្យឃើញថា ជនរងគ្រោះបានយកខ្សែនីឡុងចងសម្លាប់ខ្លួនឯងប្រាកដមែន ទើបប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕
