ប្រតិបត្តិករនៃតំបន់រមណីយដ្ឋានអង្គរ បានឲ្យដឹងថា ចំនួនភ្ញៀវទេសចរ និងចំណូលថវិកាដែលបានមកពីការលក់សំបុត្រទេសចរណ៍តំបន់អង្គរ សុទ្ធតែបានកើនឡើង នៅក្នុងត្រីមាសទី១ក្នុងឆ្នាំនេះ។ សេចក្ដីប្រកាសព័ត៌មានរបស់គ្រឹះស្ថានអង្គរ ចុះថ្ងៃទី០១ ខែកក្កដា ឆ្នាំ២០១៨។
យោងតាមសេចក្តីប្រកាសព័ត៌មានដដែលបានឱ្យដឹងថា ភ្ញៀវទេសចរបរទេសជាង ១លាន ៣៥ម៉ឺននាក់ បានចូល ទស្សនាតំបន់រមណីយដ្ឋានអង្គរចន្លោះពីខែមករា ដល់ខែមិថុនា ឆ្នាំ២០១៨ ដោយបានកើនឡើងប្រហែល ១០ភាគរយ បើធៀបនឹងរយៈពេលដូចគ្នាក្នុងឆ្នាំ២០១៧កន្លងមក។
ប្រាក់ចំណូលបានមកពីការលក់សំបុត្រជូនភ្ញៀវទេសចរបរទេសចូលទស្សនារមណីយដ្ឋានប្រវត្តិសាស្ត្រមួយនេះ ក៏បានកើនឡើងដល់ជាង ៦១លានដុល្លារផងដែរ ឬមានកំណើន ១៧.៨៤ភាគរយ បើធៀបនឹងត្រីមាសទី១កាលពីឆ្នាំមុន។ ដោយឡែកចំណូលពីការលក់សំបុត្រនៅរមណីយដ្ឋានអង្គរនេះ ត្រូវបានឧបត្ថម្ភមូលនិធិមន្ទីរពេទ្យគន្ធបុប្ផា សរុចំនួន ២,៧១៣,៩២២ ដុល្លារ ដែលជាផ្នែកមួយនៃការអនុវត្តតាមការប្ដេជ្ញាចិត្តរបស់រដ្ឋាភិបាលកម្ពុជាចំពោះមូលនិធិមន្ទីរពេទ្យកុមារមួយនេះ។
ជាមួយគ្នានោះ គ្រឹះស្ថានអង្គរ ក៏បានប្រកាសថា នៅខែមិថុនា ឆ្នាំ២០១៨ ចំនួនអ្នកទេសចរ បានទិញប័ណ្ណចូលទស្សនារមណីយដ្ឋានអង្គរ មានចំនួន ១៥០.៧៧៣ នាក់ កើន ៧.១១% ប្រៀបធៀបខែមិថុនា ឆ្នាំ២០១៧ និងទទួលបានចំណូលសរុប ៦.៤៧៨.៩៥៦ ដុល្លារ កើន ៣,៥៩% ប្រៀបធៀបខែមិថុនា ឆ្នាំ២០១៧។ នៅខែមិថុនា រាជរដ្ឋាភិបាលបានផ្តល់ឧបត្ថម្ភដល់មូលនិធិមន្ទីរពេទ្យគន្ធបុប្ផា សម្រាប់ខែមិថុនា មានចំនួន ៣០១.៥៤៦ ដុល្លារ។
របាយការណ៍របស់គ្រឹះស្ថានអង្គរ បានបង្ហាញពីចំនួនអ្នកទេសចរបរទេស និងចំណូល ក្នុងខែនីមួយៗ ក្នុងរយៈពេល ៦ខែដំបូង ឆ្នាំ២០១៨ រួមមាន៖ ខែមករា ភ្ញៀវទេសចរបរទេស ២៩៤ ៨១៣ នាក់ គិតជាទឹកប្រាក់ ១៣,៤៧៩,៦៨៦ ដុល្លារ សម្រាប់ខែកុម្ភៈ ភ្ញៀវទេសចរបរទេស ២៩៥ ៣៨៩ នាក់ គិតជាទឹកប្រាក់ ១៤ ០០៩ ០៦៨ ដុល្លារ សម្រាប់ខែមីនា ភ្ញៀវទេសចរបរទេស ២៦៨ ៣៧៨ នាក់ គិតជាទឹកប្រាក់ ១២ ១៦៨ ០៥៦ ដុល្លារ សម្រាប់ខែមេសា ភ្ញៀវទេសចរបរទេសចំនួន ១៩២ ៤១២ នាក់ គិតជាទឹកប្រាក់ ៨ ៥៩៨ ៥០៩ដុល្លារ សម្រាប់ខែឧសភា មានភ្ញៀវទេសចរបរទេសចំនួន ១៥៥ ១៩៦ នាក់ គិតជាទឹកប្រាក់ ៦ ៧៣៨ ០៧២ ដុល្លារ
ចំណែកឯខែមិថុនា មានភ្ញៀវទេសចរបរទេសចំនួន ១៥០ ៧៧៣ នាក់ ទទួលបានចំណូលសរុប ៦ ៤៧៨ ៩៥៦ ដុល្លារ។
គួររំលឹកថានៅឆ្នាំ២០១៧ ចំណូលពីការលក់ប័ណ្ណចូលទស្សនាតំបន់រមណីយដ្ឋានអង្គរ ទទួលបានភ្ញៀវទេសចរប្រមាណ ២,៤៥៧,០២៣នាក់ សរុបជាទឹកប្រាក់ចំនួន ១០៧.៩៧៦.៤៣៩ ដុល្លារ គឺកើនឡើង ៧២,៥៤ ភាគរយ ធៀបនឹងឆ្នាំ២០១៦៕