Tuesday, July 24, 2018

ព្រោះតែភ្លើងប្រចណ្ឌ បើឡានបុក ស្លាប់២នាក់ នៅប៉ៃលិន

ពិសី

ប៉ៃលិនៈ ព្រោះតែភ្លើងប្រចណ្ឌ តាមស្រលាញ់គេមិនបាន ក៏កើតចិត្តខឹងគុំគួន បានបើករថយន្តដឹកទឹកកក បុកគូស្នេហ៍ កំពុងជិះម៉ូតូឌុបគ្នា បណ្តាលអោយស្លាប់ទាំង២នៅកន្លែងកើតហេតុ។ នៅថ្ងៃទី២៤ ខែកក្កដា ឆ្នាំ២០១៨ ជនសង្ស័យ ដែលបើករថយន្តបង្ក ត្រូវបានសមត្ថកិច្ច បញ្ជូនទៅកាន់តុលាការ ដើម្បីចាត់ការតាមនីតិវិធី។

​ជនសង្ស័យឈ្មោះ ណាន់ វីន ភេទប្រុស អាយុ១៨ឆ្នាំ មុខរបរ កម្មករបើកឡាន អោយរោងចក្រទឹកកក បី អេស រស់នៅភូមិអូរតាប្រាង្គ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។

ចំណែកជនរងគ្រោះទាំង២នាក់មាន ឈ្មោះ ជួន ផាន់ណា អាយុ២៦ឆ្នាំ ជាមន្ត្រី​នគរបាល​ការពារ​ព្រំដែន​គោកវរ:សេនាតូចលេខ៨២១ បើកម៉ូតូម៉ាក​ KTM Duke ពណ៌ស​ លាយខ្មៅ ពាក់ស្លាកលេខ​ ភ្នំពេញ​ 1FK-4199 (ស្លាប់នៅកន្លែងកើតហេតុ) និង ឈ្មោះ សាន វាសនា ភេទស្រី អាយុ១៨ឆ្នាំ រស់​នៅ​ភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន​ (ស្លាប់នៅកន្លែងកើតហេតុ)​។

សូមបញ្ជាក់ផងដែរថា ហេតុការណ៍ បើកឡានដេញបុក ព្រោះតែភ្លើងប្រចណ្ឌនេះ កើតឡើង កាលពីរសៀលថ្ងៃទី២១ ខែកក្កដា ឆ្នាំ២០១៨ នៅ​ចំណុច​ផ្លូវលំក្រវ៉ាត់ព្រំដែន​ (ផ្លូវអូរឈើក្រំ) ជនសង្ស័យ បានបើកឡានទឹកកក ដេញបុកជនរងគ្រោះ កំពុង​ជិះ​ម៉ូតូ​មាន​គ្នា​ ០២នាក់​ ពីក្រោយ បណ្តាលអោយជនរងគ្រោះទាំង​ ២នាក់​ បាន​ស្លាប់ភ្លាមៗនៅកន្លែងនិងកើតហេតុ​ រួច​ជ្រុល​ទៅ​បុក​ផ្ទះ​ប្រជាពលរដ្ឋ​ថែម​ មួយខ្នង​ទៀត​។

ក្នុង​ករណី​ខាងលើ​នេះ​ ក្រោយ​ពី​ធ្វើ​ការ​ស្រាវជ្រាវ​ និង​ស៊ើបអង្កេត​របស់​ការិយាល័យ​ជំនាញ​ព្រហ្មទណ្ឌ​កម្រិត​ធ្ងន់​ ជនសង្ស័យ​បាន​សារភាព​ថា ពិត​ជា​ប៉ុនប៉ង​សម្លាប់​ជនរងគ្រោះ​ទាំង​ពីរ​នាក់​ពិត​ប្រាកមែន​ ដោយសារ​តែការ​ប្រចណ្ឌ​។

​បច្ចុប្បន្ន​ជន​សង្ស័យ​ត្រូវ​បាន​កសាង​សំណុំ​រឿង​បញ្ជូន​ទៅ​តុលាការ​ដើម្បី​ចាត់ការ​ទៅ​តាម​នីតិវិធី​ច្បាប់​៕

@Amapapa.News

Feature Ads