Tuesday, July 17, 2018

គ.ជ.ប បដិសេធសំណើរបស់ LDP ធ្វើវិសោធនកម្មកំណត់សញ្ញាគាំទ្រ លើសន្លឹកឆ្នោត

ពិសី

ភ្នំពេញៈ គណៈកម្មការជាតិរៀបចំការបោះឆ្នោត ហៅកាត់ថា គ.ជ.ប បានចេញសេចក្តីប្រកាសបដិសេធ នៅថ្ងៃទី១៦ ខែកក្កដានេះ បដិសេធទៅលើការស្នើសុំរបស់គណបក្សស័ម្ពន្ធដើម្បីប្រជាធិបតេយ្យ (LDP) ទាក់ទងនឹងការកំណត់សញ្ញាគាំទ្រលើសន្លឹកឆ្នោត ដោយត្រូវធ្វើវិសោធនកម្ម លើមាត្រា៥, មាត្រា១០៦, មាត្រា១២០ នៃច្បាប់ ស្តីពីការបោះឆ្នោតជ្រើសតាំងតំណាងរាស្ត្រ នីតិកាលទី៦។

សូមជម្រាបជូនថា លោក ខឹម វាសនា កាលពី​ថ្ងៃ​ទី១១ ខែ​កក្កដាសប្ដាហ៍មុន បាន​ស្នើ​ឲ្យ គ.ជ.ប ធ្វើ​វិសោធកម្មកំណត់​យកសញ្ញាធិក(√) តែ​មួយប៉ុណ្ណោះ សម្រាប់​គូស​ក្នុង​ប្រអប់​បួនជ្រុង​ទ្រវែង​តូច ​នៃ​គណ​បក្ស​នយោបាយ​​ណាមួយ ដែល​អ្នក​បោះ​ឆ្នោត​ពេញ​ចិត្ត។

ប្រធាន​គណ​បក្ស​សម្ព័ន្ធ​ដើម្បី​ប្រជាធិបតេយ្យ លោក ខឹម វាសនា តាម​រយៈ​លិខិត​ផ្ញើ​ទៅ​លោក ស៊ិក ប៊ុនហុក ប្រធាន គ.ជ.ប បាន​បញ្ជាក់​ថា ការ​អនុញ្ញា​ត​ឲ្យ​អ្នក​បោះ​ឆ្នោត​ អាចគូសសញ្ញា​គាំទ្រ​គណ​បក្ស​នយោបាយ ​ក្នុង​ចំណោម​គំនូសសញ្ញា​ដ៏​ច្រើន​ប្រភេទ គឺជា​ការ​សម្រេច​ចិត្ត ដែល​ខ្វះសុក្រិតភាព ព្រោះ​បង្ក​ឲ្យ​មាន​ការ​ទិញ​លក់​សន្លឹក​ឆ្នោត និង​គំរាម​កំហែង​អ្នក​បោះ​ឆ្នោត​ជា​ដើម។

លោក ខឹម វាសនា ថា ភាព​មិន​ច្បាស់​លាស់​ នៃ​ការ​កំណត់​គំនូសសញ្ញា​គាំទ្រ​គណ​បក្ស​នយោបាយ​លើស​ន្លឹក​ឆ្នោត នឹង​នាំ​ឲ្យ​មាន​វិវាទ​ក្នុង​ការបក​ស្រាយ និង​អនុ​វត្ត ចាប់​តាំង​ពី​ដំណាក់កាល​គណៈ​កម្មការ​ការិយាល័យ​រាប់​សន្លឹក​ឆ្នោត រហូត​ដល់​ក្រុម​ប្រឹក្សា​ធម្មនុញ្ញ​ទៀត​ផង។

ឆ្លើយតបចំពោះសំណើរបស់ប្រមុខគណបក្ស LDP នេះ គ.ជ.ប បានបញ្ជាក់ថា បន្ទាប់ពីបានពិនិត្យយ៉ាងយកចិត្តទុកដាក់លើទិដ្ឋភាពច្បាប់ និងទិដ្ឋភាពបច្ចេកទេស ដែលជាបទពិសោធន៍នៃការអនុវត្តការងារបោះឆ្នោតកន្លងមក គ.ជ.ប មិនអាចធ្វើវិសោធនកម្មលើចំណុច៨.១១.១ តាមការស្នើសុំបានឡើយ។ ការសម្រេចរបស់ គ.ជ.ប គឺផ្អែកលើមូលដ្ឋានច្បាប់ និងបទពិសោធន៍។

សូមអានសេចក្តីប្រកាសបដិសេធទាំងស្រុង មានខ្លឹមសារដូចតទៅ ៖

@Amapapa.News

Feature Ads