Monday, July 30, 2018

ឥទ្ធិពលគ្រឿងស្រវឹង! Pirus ព្រលះរថយន្ត Land Cruiser បត់ឆ្លងផ្លូវ​លាន់ដូចរន្ទះ​ របួសធ្ងន់ស្រាល៥នាក់

ពិសី

កណ្ដាលៈ បុរសម្នាក់ បើករថយន្ត Toyota Prius ក្នុងស្ថានភាពស្រវឹង អាងតែផ្លូវស្ងាត់ បានបោះពួយក្នុងល្បឿនយ៉ាងលឿនដូចហោះ ទៅបុករថយន្ត Land Criuser​ កំពុងបត់ឆ្លងផ្លូវ ពេញទំហឹង​លាន់ឮដូចរន្ទះ បណ្តាលឲ្យមនុស្សរងរបួសធ្ងន់ស្រាល ៥នាក់។

​គ្រោះថ្នាក់​ចរាចរណ៍រន្ធត់នេះ ​បានកើតឡើង​កាលពីវេលាម៉ោង៩៖១៥នាទីយប់ ថ្ងៃអាទិត្យ ២រោច ខែទុតិយាសាឍ ឆ្នាំច សំរឹទ្ធិស័ក​ ព.ស២៥៦២ ត្រូវនឹងថ្ងៃទី២៩ ខែកក្កដា ឆ្នាំ២០១៨នេះ នៅត្រង់ចំណុចមុខផ្ទះសំណាក់ "ភ្នំមាស" តាមបណ្ដោយ​ផ្លូវជាតិលេខ២១ ស្ថិតក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល​។

មន្ត្រីនគរបាលក្រុងតាខ្មៅ បានប្រាប់ភ្នាក់ងារ CAM POST ឲ្យ​ដឹងថា​ មុនពេលកើតហេតុ​ គេឃើញរថយន្តម៉ាក Land Criuser ពណ៌ខ្មៅ ពាក់ស្លាកលេខភ្នំពេញ 2A-5148 បើកបរដោយបុរសម្នាក់​ និងអ្នករួមដំណើរម្នាក់ ធ្វើដំណើរក្នុងទិសដៅ ពីជើងទៅត្បូង លុះមកដល់ចំណុចកើតហេតុ​ខាងលើ បានបត់ឆ្វេងឆ្លងផ្លូវ ស្រាប់តែមានរថយន្តមួយគ្រឿងទៀត ម៉ាក Toyota Prius ពណ៌ខ្មៅ ពាក់ស្លាកលេខភ្នំពេញ 2AK-2741 បើកបរដោយបុរសម្នាក់​ និងអ្នករួមដំណើរ២នាក់ទៀត ក្នុងទិសដៅពីត្បូងមកជើងវិញ បានទៅបុកជាមួយរថយន្ត Land Cruiser ចំទ្វារមុខខាងស្ដាំពេញទំហឹង លាន់លឺ​ដូចរន្ទះតែម្ដង បណ្តាលរថយន្តទាំងពីរគ្រឿងនោះ បានរងការខូចខាតខ្ទេចយ៉ាងដំណំ និងបណ្ដាលឲ្យអ្នកបើកបរឈ្មោះ កែវ រិទ្ធី អាយុប្រហែល ៣០ឆ្នាំ មានអាសយដ្ឋាននៅភូមិក្របៅ សង្កាត់កំពង់សំណាញ់ ក្រុងតាខ្មៅ ខេត្តកណ្តាល រងរបួសធ្ងន់ បាក់ជើងខាងស្តាំ និងអ្នករួមដំណើរម្នាក់រងរបួសធ្ងន់ បាក់ខាងស្តាំ ដូចគ្នា និងម្នាក់ទៀតរបួសស្រាល ត្រូវបានប្រជាពលរដ្ឋនាំគ្នាចេញមកចោមរោមជួយសង្គ្រោះបឋមសិន និងរាយការណ៍ប្រាប់សមត្ថកិច្ចចុះមកកន្លែងកើតហេតុភ្លាមៗ រួចយករថយន្តសង្គ្រោះ របស់ស្នងការដ្ឋាននគរបាលខេត្តកណ្តាល មកជួយដឹកយកអ្នករបួសធ្ងន់ស្រាល៣នាក់នោះ ទៅសង្រ្គោះនៅមន្ទីរពេទ្យព្រះកុសមៈ។

មន្ត្រីនគរបាលក្រុងតាខ្មៅ បន្តថា អ្នករបួស២នាក់ទៀតជិះរថយន្ត Land Cruiser មានអ្នកបើកបររងរបួសស្រាល ឈ្មោះ សោម ប៊ុណ្ណារ៉ា ភេទប្រុស អាយុ៥៨ឆ្នាំ មានទីលំនៅភូមិគ្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ និងអ្នករួមដំណើរម្នាក់ ភេទប្រុស មិនទាន់ស្គាល់ឈ្មោះ រងរបួសស្រាល ត្រូវបានក្រុមគ្រួសារដឹកយកទៅព្យាបាលរបួសដោយខ្លួនឯង។

អធិការរងនគរបាលក្រុងតាខ្មៅ ទទួលបន្ទុក​ចរាចរណ៍​ បានបញ្ជាក់ប្រាប់ភ្នាក់ងារ CAM POST ដឹងថា មូលហេតុដែលបណ្ដាលឲ្យគ្រោះថ្នាក់នោះ គឺមកពីអ្នកបើកបររថយន្តម៉ាក Land Criuser បើកបរបត់ឆ្វេង ខ្វះការប្រុងប្រយ័ត្ន ចំណែកអ្នកបើកបររថយន្តម៉ាក Toyota Prius បើកក្នុងល្បឿនលឿន និងបើកបរក្នុងស្ថានភាពមានជាតិស្រវឹង។

បច្ចុប្បន្ន​ក្រោយកើតហេតុរថយន្តទាំង២គ្រឿង ត្រូវបានកម្លាំងនគរបាលជំនាញចុះធ្វើការវាស់វែង និងស្ទូចយកមករក្សាទុកនៅអធិការដ្ឋាននគរបាលក្រុងតាខ្មៅ ដើម្បីចាត់ចែងដោះស្រាយតាមនីតិវិធី៕

@Amapapa.News

Feature Ads