គិតរហូតមកដល់ពេលនេះ ចំនួនមនុស្សស្លាប់ដោយសារដីបាក់ និងគ្រោះទឹកជំនន់ដោយសារភ្លៀងធ្លាក់ជោគជាំ នៅទីក្រុងហ៊ីរ៉ូស៊ីម៉ា ប្រទេសជប៉ុន បានកើនដល់ ១១២នាក់ហើយ ខណៈជនរងគ្រោះយ៉ាងតិច ០៣នាក់ កំពុងមានរបួសធ្ងន់ធ្ងរ និង៧៩នាក់ទៀតនៅបន្តបាត់ខ្លួន។ នេះបើយោងតាមការចុះផ្សាយរបស់ទីភ្នាក់ងារព័ត៌មាន ស៊ីនហួរ នៅល្ងាចថ្ងៃចន្ទ ទី០៩ ខែកក្កដា ឆ្នាំ២០១៨ នេះ។ ចំនួនមនុស្សស្លាប់អាចនឹងមានការបន្តកើនឡើងថែមទៀត។
ប្រតិបត្តិការរុករកនិងជួយសង្រ្គោះជនរងគ្រោះបាននិងកំពុងបន្តប្រព្រឹត្តទៅយ៉ាងខ្លាំងក្លាជាទីបំផុត នៅតាមតំបន់រងគ្រោះធ្ងន់ខ្លាំងដូចជាខេត្តហ៊ីរ៉ូស៊ីម៉ា (Hiroshima) ដែលមានមនុស្ស ៤៤នាក់បាត់បង់ជីវិត ព្រមទាំងតំបន់មួយចំនួនទៀតដែលរងគ្រោះ។
បើតាមក្រុមប្រតិបត្តិករបានឱ្យដឹងថា មនុស្សជាច្រើននាក់កំពុងនៅជាប់គាំងក្នុងផ្ទះរបស់ពួកគេ ដោយសារតែផ្លូវថ្នល់ត្រូវបានកាត់ផ្តាច់ និងជន់លិច ខណៈសេចក្តីបង្គាប់ឱ្យជម្លៀសខ្លួន ត្រូវបានដាក់ចេញសម្រាប់ប្រជាជនជប៉ុនជិត ០៦លាននាក់ទៀត នៅតាមខេត្តចំនួន១៩។
គួររំលឹកថា អាជ្ញាធរជប៉ុនបានចេញបញ្ជាឱ្យជម្លៀសមនុស្សដល់ទៅ ៤.៧២លាននាក់ ចេញតំបន់មួយចំនួននៅទីក្រុងឃ្យូតូ (Kyoto) បន្ទាប់ពីទីក្រុងបុរាណមួយនេះ ទទួលរងភ្លៀងធ្លាក់ជោគជាំចាប់តាំងពីថ្ងៃព្រហស្បតិ៍ សប្តាហ៍មុនដែលបង្កឱ្យបាក់ដី និងទឹកជំនន់លិចផ្ទះសម្បែង និងហូរកួចយករថយន្តរាប់ម៉ឺនគ្រឿង។
សូមបញ្ជាក់ថា កាលពីខែសីហា ឆ្នាំ២០១៤ នៅទីក្រុងហ៊ីរ៉ូស៊ីម៉ានេះ ក៏មានជំនន់ទឹកភ្លៀងដ៏អាក្រក់មួយបានធ្លាក់ជោគជាំបង្កឱ្យបាក់ដី និងបំផ្លាញផ្ទះសម្បែង បានសម្លាប់មនុស្ស ៧៧នាក់។