កណ្ដាលៈ ក្រុមក្មេងស្ទាវបង្កអសន្តិសុខនៅតាមដងផ្លូវ ត្រូវបាននគរបាលក្រុងតាខ្មៅ សហការជាមួយប្រជាពលរដ្ឋធ្វើការឃាត់ខ្លួនបានភ្លាមៗ បន្ទាប់ពីក្រុមទាំងនោះ បានធ្វើសកម្មភាពជិះម៉ូតូដេញបំបុកជនរងគ្រោះពីក្រោយ រួចវាយទាត់ធាក់ ព្រោះខឹងជនរងគ្រោះគប់ដុំថ្មទៅលើក្រុមខ្លួន។ ហេតុការណ៍នេះ បង្កការភ្ញាក់ផ្អើលឡើងកាលពីវេលាម៉ោង១៖២០នាទីរសៀល ថ្ងៃទី២២ ខែសីហា ឆ្នាំ២០១៨ នៅចំណុចរង្វង់មូលតាខ្មៅ ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល។
វរសេនីយ៍ ស កែវពិសិដដ្ឋ អធិការនគរបាលក្រុងតាខ្មៅ ឲ្យដឹងថា ជនរងគ្រោះឈ្មោះ ប៉ែន រិទ្ធារាជ្យ ភេទប្រុស អាយុ១៨ឆ្នាំ មានទីលំនៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរសិស្ស (រងរបួសបាក់ធ្មេញ១ និងរយះបបូរមាត់)។ ដោយសារជនរងគ្រោះរបួសគ្រាំក្នុងធ្ងន់ធ្ងរពេក ទើបមិនអាចសង្គ្រោះបាន ក៏ដាច់ខ្យល់ស្លាប់តែម្តង។
ចំណែកជនសង្ស័យមានគ្នា៤នាក់ ទី១-ឈ្មោះ ស្លេះ រុំម៉ាលី ភេទប្រុស អាយុ១៧ឆ្នាំ ជនជាតិខ្មែរឥស្លាម ទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរកម្មកររោងចក្រ។ ទី២-ឈ្មោះ លាស់ ខរី ភេទប្រុស អយុ១៨ឆ្នាំ ជនជាតិខ្មែរឥស្លាម មានទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរមិនពិតប្រាកដ។ ទី៣-ឈ្មោះ អាលី មីហ្សាន ភេទប្រុស អាយុ១៧ឆ្នាំ ជនជាតិខ្មែរឥស្លាម មានទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរកម្មកររោងចក្រ និងទី៤-ឈ្មោះ ម៉ាត់ ស្មាអ៊ែល ភេទប្រុស អាយុ១៥ឆ្នាំ ជនជាតិខ្មែរឥស្លាម មានទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរមិនពិតប្រាកដ។
លោកអធិការបញ្ជាក់ថា នៅមុនពេលកើតហេតុ ក្រុមជនសង្ស័យកំពុងតែអង្គុយលេងលើម៉ូតូ នៅចំណុចអ្នកតាថៃជឺមាត់ទន្លេ ស្រាប់តែជនរងគ្រោះបានជិះម៉ូតូមកគប់ក្រុមជនសង្ស័យ ធ្វើឲ្យពួកគេខឹងក៏បានជិះម៉ូតូដេញតាមដល់កន្លែងកើតហេតុខាងលើ ស្រាប់តែជនសង្ស័យជិះម៉ូតូបុកម៉ូតូជនរងគ្រោះពីក្រោយ ធ្វើឲ្យម៉ូតូទាំងពីរជ្រុលចង្កូតទៅបុកខឿនលោកតាម៉ៅ ដួលបោកទាំងសងខាង។ បន្ទាប់មក ជនសង្ស័យក៏ស្ទុះទៅទាត់ធាក់ជនរងគ្រោះបន្ថែមទៀត បណ្តាលឲ្យរងរបួសបាក់ធ្មេញ និងរយះបបូរមាត់ ហើយត្រូវបានក្រុមគ្រួសារដឹកយកទៅព្យាបាលនៅមន្ទីរពេទ្យកាល់ម៉ែត តែដោយសារជនរងគ្រោះរបួសគ្រាំក្នុងធ្ងន់ធ្ងរពេក ទើបមិនអាចសង្គ្រោះបាន ក៏ដាច់ខ្យល់ស្លាប់តែម្តង។
ក្រោយពេលជនរងគ្រោះស្លាប់ និងក្រោយទទួលពាក្យបណ្ដឹងពីក្រុមគ្រួសារសពផង សមត្ថកិច្ចបានបើកការស្រាវជ្រាវ និងឈានទៅដល់ការឃាត់ខ្លួនជនសង្ស័យទាំង៤នាក់ ហើយបញ្ជូនទៅអធិការដ្ឋាននគរបាលក្រុងតាខ្មៅ ដើម្បីធ្វើការសាកសួរបន្ថែម ក៏ដូចជាកសាងសំណុំរឿងចាត់ការតាមនីតិវិធីច្បាប់៕