នៅថ្ងៃទី២៦ ខែសីហា ឆ្នាំ២០១៨ នេះ អង្គការអន្ដរជាតិចំនួន៥ រួមមានតំណាងរាស្រ្តអាស៊ានដើម្បីសិទ្ធិមនុស្ស (ASEAN Parliamentarians for Human Rights) បណ្តាញអាស៊ីដើម្បីការបោះឆ្នោតសេរី (Asian Network for Free Elections) អង្គការ CIVICUS អង្គការឃ្លាំមើលសិទ្ធិមនុស្ស ((Human Rights Watch) ហើយនិងសម្ព័ន្ធសារព័ត៌មានអាស៊ីអាគ្នេយ៍ (Southeast Asian Press Alliance) បានទទូចឱ្យតុលាការកម្ពុជាទម្លាក់ការចោទប្រកាន់លើក្រុមអ្នកការពារសិទ្ធិមនុស្ស៥រូប ដោយអះអាងថា ការចោទប្រកាន់ទាំងនោះ គឺជាចរិតនយោបាយ និងជាការយាយីដល់សិទ្ធិសេរីភាពរបស់អង្គការសង្គមស៊ីវិល។ យោងតាមការចុះផ្សាយរបស់សារព័ត៌មាន aseanmp.org.
អង្គការអន្ដរជាតិទាំងនេះបន្ដថា រដ្ឋាភិបាលកម្ពុជាបានរំលោភគោលការណ៍នៃកតិកាសញ្ញាអន្តរជាតិ ស្ដីពីសិទ្ធិសង្គម និងសិទ្ធិនយោបាយ ដែលបានរំលោភបំពានសិទ្ធិ សេរីភាព ក្នុងការបញ្ចេញមតិ ការបង្កើតសមាគម និងការជួបជុំគ្នាដោយសន្ដិវិធី ហើយដែលសិទ្ធិទាំងអស់នេះក៏ត្រូវបានធានាដោយរដ្ឋធម្មនុញ្ញកម្ពុជាផងនោះ។
ហើយវាការជាចេតនាបំផ្លាញអង្គការសង្គមស៊ីវិល ខណៈដែលប្រទេសកម្ពុជាកំពុងតែធ្វើដំណើរទៅរការដឹកនាំដោយឯកបក្ស។
មន្រ្តីសមាគមសិទ្ធិមនុស្សអាហុកទាំងនោះ រួមមាន៖ លោក យី សុខសាន្ត លោក ណៃ វ៉ង់ដា លោក នី សុខា លោកស្រី លឹម មុន្នី ហើយនិង លោក នី ចរិយា អតីតប្រធានស៊ើបអង្គេតអាដហុក និងបច្ចុប្បន្នជាអគ្គលេខាធិការរង គណៈកម្មាធិការជាតិរៀបចំការបោះឆ្នោត (គជប)។ អ្នកទាំង៥រូបត្រូវបានតុលាការសាលាដំបូងរាជធានីភ្នំពេញដោះលែងឲ្យនៅក្រៅឃុំបណ្ដោះអាសន្ន ក្រោយស៊ើបសួរចប់ហើយនៅល្ងាចថ្ងៃទី២៩ ខែមិថុនា ឆ្នាំ២០១៧។
គួររំលឹកថា៖ អ្នកទាំងប្រាំរូបខាងនេះត្រូវបានអង្គភាពប្រឆាំងអំពើពុករលួយ (ACU) ឃាត់ខ្លួនកាលពីអំឡុងខែមេសា ឆ្នាំ២០១៦។ ហើយអ្នកទាំង៥ រងការចោទប្រកាន់ថា មានជាប់ទាក់ទិនបទចោទសូកប៉ាន់សាក្សី និងសមគំនិតអំពើសូកប៉ាន់សាក្សីក្នុងរឿងអាស្រូវស្នេហារបស់អ្នកនាង ខុម ចាន់តារាទី ហៅស្រីមុំ។