Monday, August 27, 2018

ចាប់ខ្លួនជនសង្ស័យ២នាក់ ក្នុងចំណោមបក្ខពួក៤នាក់ ក្រោយធ្វើសកម្មភាពឆក់ទូរស័ព្ទដៃ

អាម៉ាប៉ាប៉ាញ៉ូស

ភ្នំពេញៈ កម្លាំងប៉ុស្តិ៍នគរបាលរដ្ឋបាលស្រះចក នៃអធិការដ្ឋាននគរបាលខណ្ឌដូនពេញ បានឃាត់ខ្លួនជនសង្ស័យ ចំនួន២នាក់ (ក្នុងចំណោមបក្ខពួក៤នាក់) ពីបទលួចមានស្ថានទម្ងន់ទោស ដោយប្រើអំពើហិង្សា (ជិះម៉ូតូឆក់ទូរស័ព្ទដៃ) កាលពីថ្ងៃអាទិត្យ ១៥កើត ខែស្រាពណ៍ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី២៦ ខែសីហា ឆ្នាំ២០១៨ វេលាម៉ោង៤៖១០នាទី នៅចំណុចមុខភោជ្ជនីយដ្ឋានកាល់ម៉ែត ផ្លូវព្រះមុន្នីវង្ស ភូមិទី៧ សង្កាត់ស្រះចក ខណ្ឌដូនពេញ រាជធានីភ្នំពេញ ។

សមត្ថកិច្ចបានឲ្យដឹងថា ជនសង្ស័យត្រូវឃាត់ខ្លួន ទី១. ឈ្មោះ អីុ ប៊ុនថេង ភេទប្រុស អាយុ២១ឆ្នាំ ជនជាតិខ្មែរ មុខរបរ មិនប្រាកដ មានទីលំនៅផ្ទះជួល ផ្លូវលំ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ (ជាអ្នកបើកម៉ូតូ) ។ ទី២. ឈ្មោះ សោភ័ណ្ឌ សីហា ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនប្រាកដ មានទីលំនៅផ្ទះជួល ផ្លូវលេខ៧០ សង្កាត់ស្រះចក ខណ្ឌដូនពេញ រាជធានីភ្នំពេញ (ជាអ្នកអង្គុយក្រោយធ្វើសកម្មភាពឆក់ទូរស័ព្ទដៃ) ។

វត្ថុតាងចាប់យកបាន រួមមាន៖ ទូរស័ព្ទដៃម៉ាក HUAWEI ពណ៌ខ្មៅ មានស៊ីមលេខ ០១៦ ៩៤៩៤៩៥ (ជារបស់ជនរងគ្រោះ) និងម៉ូតូមួយគ្រឿង ម៉ាកC125 ពណ៌ខ្មៅ ពាក់ស្លាកលេខ ភ្នំពេញ 1HD-1519 (ជាមធ្យោបាយជិះធ្វើសកម្មភាពរបស់ជនសង្ស័យ) ជនសង្ស័យទាំង២នាក់ ធ្លាប់ប្រើប្រាស់គ្រឿងញៀន។ ចំណែកជនរងគ្រោះមានឈ្មោះ សុខ និស្ស័យ ភេទប្រុស អាយុ៤៨ឆ្នាំ ជនជាតិខ្មែរ មុខរបរ លក់ដូរ មានទីលំនៅផ្ទះលេខ២១ ផ្លូវលេខ១៧ សង្កាត់ផ្សារចាស់ ខណ្ឌដូនពេញ រាជធានីភ្នំពេញ ។

បច្ចុប្បន្ន ជនសង្ស័យទាំង២នាក់ សមត្ថកិច្ចកំពុងឃាត់ខ្លួននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងចាត់ការតាមនីតិវិធីច្បាប់៕

@Amapapa.News

Feature Ads