កំពង់ចាមៈ លោក សេង ទៀង ជំនួយការផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាននាំយកអំណោយជាថវិកា និងសម្ភារៈ ស្បៀងអាហារ ជូនដល់គ្រួសារកូនភ្លោះ៣នាក់ កាលពីព្រឹកថ្ងៃទី១០ ខែសីហា ឆ្នាំ២០១៨ នៅមន្ទីរពេទ្យបង្អែកខេត្តកំពង់ចាម ។
ឆ្លៀតក្នុងឱកាសនោះដែរ លោក សេង ទៀង ជំនួយការផ្ទាល់សម្តេចតេជោ បានពាំនាំនូវសេចក្ដីនឹករលឹក និងការសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន ដែលជានិច្ចកាលតែងតែគិតគូរពីសុខទុក្ខ របស់បងប្អូនប្រជាពលរដ្ឋ ជាពិសេស គ្រួសារកូនភ្លោះ៣ ឬ៤នាក់ ដែលជួបការខ្វះខាតច្រើន ក្នុងការថែទាំទារក និងម្តាយទារក ដោយមិនប្រកាន់និន្នាការគណបក្សនយោបាយ ឬពណ៌សម្បុរជាតិសាសន៍អ្វីឡើយ ។
សូមបញ្ជាក់ថា កូនភ្លោះប្រុសទាំង៣នាក់ ដែលសម្តេចចាត់ទុកជាចៅរបស់សម្ដេចនេះ មានសុខភាពល្អជាធម្មតាទេ ដោយក្រុមគ្រូពេទ្យខេត្តកំពង់ចាម កំពុងតែធ្វើការថែទាំយ៉ាងយកចិត្តទុកដាក់បំផុត កូនទី១-ឈ្មោះ ឱក សុខនឿន ទម្ងន់១,៧៥គីឡូក្រាម, ទី២-ឈ្មោះ ឱក សុខឌឿន ១,៧១គីឡូក្រាម និងទី៣-ឈ្មោះ ឱក សុខឌី ទម្ងន់១,៣៥គីឡូក្រាម ដែលជាកូនទី២ក្នុងគ្រួសារកសិករ ដែលមានឪពុកឈ្មោះ ឱក សុខគង់ អាយុ៣៥ឆ្នាំ និងម្តាយឈ្មោះ ប៊ុន កុសល អាយុ២៣ឆ្នាំ មានទីលំនៅភូមិទី៤ ឃុំព្រែកអាជី ស្រុកក្រូចឆ្មារ ខេត្តត្បូងឃ្មុំ ។
អំណោយដែលត្រូវទទួលបានរួមមាន ថវិកា៥លានរៀល, អង្ករ៤បេ ស្មើនឹង២០០គីឡូក្រាម, ម្សៅទឹកដោះគោ២កេស និងសម្ភារៈមួយចំនួនទៀត ក្នុងនោះដែរ សម្តេចតេជោ ហ៊ុន សែន បានជួយឧបត្ថម្ភប្រាក់ចំនួន១០០០ដុល្លារអាមេរិក បន្ថែម ព្រោះស្ត្រីជាម្ដាយទារក ត្រូវធ្វើការវះកាត់ពីសំណាក់ក្រុមគ្រូពេទ្យ ហើយត្រូវការថែទាំសុខភាពទៅមុខទៀត៕
