ស្វាយរៀងៈ ប្រជាពលរដ្ឋព្រួយបារម្ភអំពីសត្វ ក្របី គោ បាត់ ខណៈមានក្រុមហ៊ុននាំ ក្របី គោ ចេញទៅប្រទេសវៀតណាមដោយគ្មានការត្រួតពិនិត្យពីមន្រ្តីជំនាញ គឺដឹកតាមរថយន្តយកទៅទម្លាក់តាមព្រំដែនរួចដឹកចេញតាមច្រករបៀង ក្នុងមួយថ្ងៃៗ ចាប់ពី២០ក្បាលទៅ៣០ក្បាល ដោយសារតែមានភ្លើងខៀវពីសមត្ថកិច្ចឈរជើងតាមច្រករបៀងទាំងនោះ ។
ជាក់ស្តែងកាលពីថ្ងៃទី២ ខែសីហា ឆ្នាំ២០១៨ ឈ្មួញបានដឹកក្របីតាមរថយន្ត២គ្រឿង មានសត្វក្របីជាង២០ក្បាល ចុះត្រង់ចំណុចវត្តតាឡុក ស្ថិតនៅភូមិបាវិតកណ្តាល សង្កាត់បាវិត ក្រុងបាវិត គឺរថយន្តកូរ៉េ ម៉ាកហ៊ីយិនដាយ ចំណុះ២តោនកន្លះ ពាក់ស្លាកលេខ ភ្នំពេញ3B 0348 និងរថយន្ត១គ្រឿងទៀត ម៉ាកហ៊ីយ៉ាន់ដាយ ចំណុះ២តោនកន្លះ ដូចគ្នា ពណ៌ស គ្មានស្លាកលេខនោះឡើយ ។
ទាក់ទិនករណីខាងលើនេះ លោក ឈិន សៅ មន្ត្រីការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀងមានប្រសាសន៍ថា ៖ «បញ្ហាឈ្មួញនាំក្របីចេញទៅវៀតណាម តាមច្រករបៀងវត្តតាឡុក ក្រុងបាវិត លោកមិនបានដឹងនោះទេ» ។ លោកបន្តថា «កន្លងមក មានក្រុមហ៊ុនយុវពាណិជ្ជ ដែលមានឈ្មោះ ស្នា ជាអ្នកគ្រប់គ្រងនាំក្របីឆ្លងកាត់ និងគ្រប់គ្រងប្រមូលទិញ គោ និងក្របី ផ្គត់ផ្គង់ទីផ្សារក្នុងស្រុក ឬឡសត្តឃាតក្នុងខេត្តតែប៉ុណ្ណោះ រឿងនាំ ក្របី គោ ចេញនេះ លោកអត់បានដឹងនោះទេ» ។
ជាមួយគ្នានេះ លោក ស្នា តំណាងក្រុមហ៊ុនយុវពាណិជ្ជបានឲ្យដឹងថា «បញ្ហាច្បាប់ទម្លាប់ លោកមិនសូវដឹងទេ លោកគ្រាន់តែមើលការងារឲ្យក្រុមហ៊ុននាំក្របីឆ្លងកាត់ រីឯក្របី គោ ក្នុងខេត្តស្វាយរៀង គឺមាន អាជីវករដើរប្រមូលទិញ តាមភូមិ ស្រុក ផ្គត់ផ្គង់ទីផ្សារក្នុងស្រុក ហើយលើសពីការផ្គត់ផ្គង់ក្នុងស្រុក អជីវករបានសុំនាំចេញ ទៅលក់នៅប្រទេសវៀតណាមពី១០ក្បាលទៅ២០ក្បាល លោកក៏ជួយសម្រួលអោយទៅ» ។
អាជីវករម្នាក់នៅភូមិព្រៃផ្តៅ សង្កាត់បាវិត ក្រុងបាវិត ខេត្តស្វាយរៀងបាននិយាយថា៖ ពួកគេប្រមូលទិញ ក្របី គោ ពីប្រជាពលរដ្ឋលក់ឲ្យវៀតណាម គេមកទិញដល់ក្រោល ហើយជួលរថយន្តខ្មែរដឹកទៅទម្លាក់នៅតាមព្រំដែន ដោយបង់(លុយ)ឲ្យឈ្មោះ ស្នា ក្របីតូច១ក្បាល៥ម៉ឺនរៀល ក្របីធំ១ក្បាល១០ម៉ឺនរៀល ក្នុងនោះវៀតណាម ក៏បានបង់ឲ្យសមត្ថកិច្ចយាមនៅច្រករបៀង និងពេទ្យសត្វផងដែរ ក៏ប៉ុន្តែមិនដឹង១ក្បាល បង់ប៉ុន្មាននោះទេ ។
ជនរងគ្រោះម្ចាស់គោម្នាក់ ឈ្មោះ លឹម ពិសិដ្ឋ ភេទស្រី អាយុ៤០ឆ្នាំ រស់នៅភូមិថ្នល់កែង ឃុំកណ្តៀងរាយ ស្រុកស្វាយទាប បានឲ្យដឹងថា៖ កាលពីថ្ងៃទី៣ ខែកក្កដា ឆ្នាំ២០១៨ វេលាម៉ោង២រសៀល មានចោរលួចគោរបស់គាត់មួយក្បាល ដែលចងឲ្យស៊ីស្មៅនៅវាលស្រែខាងក្រោយផ្ទះចម្ងាយ២០០ម៉ែត្រនោះ យកទៅបាត់ ក្រោយមកស្រាប់តែឃើញគេដឹកតាមរ៉ឺម៉ក ក៏នាំគ្នាជិះម៉ូតូដេញតាមរហូតដល់ខាងមុខរោងចក្រសានតុង ស្ថិតនៅភូមិជ្រៃធំ សង្កាត់ព្រៃអង្គុញ ក្រុងបាវិត ទើបស្ទាក់ចាប់បានជនសង្ស័យម្នាក់ឈ្មោះ ប៉ុន វុន ភេទប្រុស អាយុ៧៦ឆ្នាំ មានទីលំនៅភូមិដើមពោធិ ឃុំស្វាយតាយាន ស្រុកកំពង់រោទ៌ ខេត្តស្វាយរៀង ហើយបានប្រគល់ជននេះឲ្យសមត្ថកិច្ចសង្កាត់ព្រៃអង្គុញដើម្បីដោះស្រាយ ក៏ប៉ុន្តែសមត្ថកិច្ចនគបាលព្រៃអង្គុញ បានបញ្ជូនជនសង្ស័យទៅឃុំស្វាយតាយាន ដើម្បីសាកសួរ ជនសង្ស័យបានឆ្លើយថា៖ គេគ្រាន់តែជាអ្នកដឹកស៊ីឈ្នួលឲ្យក្រុមហ៊ុននោះទេ ហើយសមត្ថកិច្ចចាប់ផ្តើមស្រាវជ្រាវបន្ត ។
សូមបញ្ជាក់ថា កន្លងមក សត្វគោក្របីប្រជាពលរដ្ឋបានបាត់រកមិនឃើញនោះទេ ដូច្នេះប្រជាពលរដ្ឋមានការព្រួយបារម្ភយ៉ាងខ្លាំងអំពីសុវត្ថិភាពគោ ក្របី របស់ពួកគាត់ ដោយសារតែមានឈ្មួញដើរប្រមូលទិញគោក្របីទៅប្រទេសវៀតណាមយ៉ាងនេះ ដោយយកស្លាកក្រុមហ៊ុនមកបិទបាំង ប្រមូលទិញគោក្របីពីអ្នកស្រុក ហើយពួកចោរ ក៏ឆ្លៀតឱកាសលួចគោក្របីអ្នកស្រុកទាំងថ្ងៃចែសនាំទៅវៀតណាមតែម្តងដោយគ្មានខ្លាចញញើត ។
ពាក់ព័ន្ធបញ្ហានេះ មន្រ្តីម្នាក់បានសុំមិនបញ្ចេញឈ្មោះបង្ហើបប្រាប់ឲ្យដឹងថា៖ សមត្ថកិច្ចតាមច្រករបៀងមិនហ៊ានជាមួយតំណាងក្រុមហ៊ុននោះឡើយ ។ តំណាងក្រុមហ៊ុននេះ គេនិយាយយកឈ្មោះអ្នកធំរូបនេះ អ្នកធំរូបនោះមកធ្វើជាខ្នងបង្អែក ទើបសមត្ថកិច្ចសុំតែលុយបាយមួយក្បាល៥ម៉ឺនដុងប្រាក់វៀតណាមប៉ុណ្ណោះ ៕
