Saturday, August 11, 2018

បក្សលោក ពេជ្រ ស្រស់ មិនទទួលស្គាល់លទ្ធផលបណ្តោះអាសន្នដែលប្រកាសដោយ គ.ជ.ប

រិទ្ធី

ក្រោយពីគណៈកម្មាធិការជាតិរៀបចំការបោះឆ្នោត គ.ជ.ប បានប្រកាសលទ្ធផលបណ្តោះអាសន្ននៃការបោះឆ្នោតជ្រើសតាំងតំណាងរាស្ត្រនីតិកាលទី៦ បានប៉ុន្មានម៉ោង លោក ពេជ្រ ស្រស់ ប្រធានគណបក្សយុវជនកម្ពុជាដែលបានចូលរួមការប្រកួតប្រជែងដែរនោះ បានបដិសេធមិនទទួលស្គាល់លទ្ធផលនេះទេ។

លោក ពេជ្រ ស្រស់ បាននិយាយថា៖ ខ្ញុំ ពេជ្រ ស្រស់ ប្រធានគណបក្សយុវជនកម្ពុជានឹងធ្វើលិខិតប្តឹងទៅគ.ជ.ប ដើម្បីរាប់សន្លឹកឆ្នោតឡើងវិញ។

ប្រធានគណបក្សយុវជនកម្ពុជាបានអះអាងថា៖ ចំនួនលទ្ធផលបណ្តោះអាសន្ននេះមិនត្រឹមត្រូវទេសម្រាប់គណបក្សយុវជនកម្ពុជា។ ចំនួនអ្នកគាំទ្រគណបក្សយុវជនកម្ពុជាពិតប្រាកដគឺមានចំនួន៣៩ ៤១៧សំឡេង មិនមែន៣៩ ៣៣៣សំឡេងនោះទេ។ យើងត្រូវគោរពឆន្ទៈរបស់ម្ចាស់ឆ្នោតមិនអាចកិបកេងបានឡើយ។

យោងតាមលទ្ធផលបណ្តោះអាសន្នដែលបាប្រកាសដោយគ.ជ.ប កាលពីព្រឹកមិញនេះ គឺគណបក្សប្រជាជនកម្ពុជាទទួលបានសំឡេងគាំទ្រច្រើនជាងគេចំនួន៤ ៨៨៩ ១១៣ ចំណែកឯគណបក្សយុវជនរបស់លោក ពេជ្រ ស្រស់ ទទួលបាន៣៩ ៣៣៣ សំឡេង។

តាមគ.ជ.ប បានឱ្យដឹងថាគណបក្សនយោបាយអាចប្តឹងតវ៉ាអំពីលទ្ធផលមួយផ្នែកឬលទ្ធផលទាំងអស់នៃការបោះឆ្នោតក្នុងរយៈពេល៧២ម៉ោងយ៉ាងយូរបន្ទាប់ពីការប្រកាសលទ្ធផលបណ្តោះអាសន្ន អនុលោមតាមមាត្រា១៣១នៃច្បាប់ស្តីពីការបោះឆ្នោតជ្រើសតាំងតំណាងរាស្រ្ត។

@Amapapa.News

Feature Ads