Wednesday, August 1, 2018

ទី​តាំង​​ហ្គេម​​បាញ់​ត្រី​​ ​ក្នុង​សង្កាត់​ព្រែកប្រា​​ កំពុងបើកលេងយ៉ាងរំភើយ មានទាំងអ្នកកាសែតចាំយកលុយទាំងព្រឹកទៀត

ពិសី

ភ្នំពេញៈ ល្បែងហ្គេមបាញ់ត្រីមួយកន្លែង បើកលេងម៉ាសេរីតាមផ្លូវបេតុង ជិតបុរីហាយតិច១ ភូមិព្រះពន្លា សង្កាត់ព្រែកប្រា ខណ្ឌច្បារអំពៅ​ ទោះបីជាកន្លងទៅថ្មីៗនេះ មានទីតាំងល្បែងហ្គេមជាច្រើនកន្លែង ត្រូវបានលោកអភិបាលរងខណ្ឌច្បារអំពៅ ចុះបង្រ្កាបជាបន្តបន្ទាប់ និងដុតបំផ្លាញចោលក៏ដោយ តែទីតាំងល្បែងហ្គេមបាញ់ត្រីស៊ីសងមួយកន្លែងខាងលើនេះ ត្រូវបានអាជ្ញាធរខណ្ឌច្បារអំពៅមើលរំលងទៅវិញ ។

ប្រជាពលរដ្ឋ​បាន​បង្ហើប​ប្រាប់​ថា ផ្ទះ​ល្វែង​មួយ​កន្លែង​ខាង​កើត​បុរីហាយតិច១ ប្រហែល​៤០០​ម៉ែត្រ តាមផ្លូវ​បេតុង​ ភូមិព្រះពន្លា សង្កាត់ព្រែកប្រា ខណ្ឌច្បារអំពៅ​ ដែលលួចលាក់បើកល្បែងបាញ់ត្រីស៊ីសងនោះ បានកំពុង​បើក​លេង​យ៉ាង​រំភើ​យ និង​មាន​ក្រុម​ក្មេង​ស្ទាវ​ជា​ច្រើន​បាន​ចូល​លេង​ទាំង​យប់ទាំង​ថ្ងៃ​ ដោយសង្ស័យ​អាច​នឹងមាន​ការពពាក់ពពូនគ្នា​ប្រើ​ប្រាស់​ថ្នាំ​ញៀន​ទៀត​ផង ដែលធ្វើឲ្យពួកគាត់ជាប្រជាពលរដ្ឋ មានការងឿងឆ្ងល់យ៉ាងខ្លាំង ពួកគាត់មិនដឹងថា ក្រុមម្ចាស់ទីតាំងនេះចេះសិល្ប៍ស្ពិនភ្នែក ឬក៏ខាងសាលាខណ្ឌ ជាអ្នកអនុញ្ញាតនោះឡើយ ប៉ុន្តែបើមើលទៅសកម្មភាពការបើកលេងនេះ​ គឺបើកលេងជាលក្ខណៈបំភ័ណ្ឌភ្នែកមហាជន មិនបើកចំហរទេ ដោយនូវខាងក្នុងប្រមូលម្តុំដោយក្រុមក្មេងទំនើង គេចសាលា គេចផ្ទះសំបែង ពួនសង្ងំនៅក្នុងនោះ។ អ្វីបន្ថែមនោះទៀតដែលធ្វើឲ្យពួកគាត់អត់យល់ពីចំណាត់ការ និងអនុសាសន៍របស់លោកអភិបាលខណ្ឌច្បារអំពៅនេះឡើយ ។

ជាក់ស្ដែង​នៅព្រឹកថ្ងៃទី១ ខែសីហា ឆ្នាំ២០១៨នេះ គេឃើញមានទាំងអ្នកកាសែត និងក្រុមអ្នកសារព័ត៌មាន របស់អង្គភាព និងស្ថាប័នមានតែឈ្មោះរាប់សិបអ្នក នៅអង្គុយរងចាំយកលុយបន្តបន្ទាប់គ្នា ដើម្បីបិទព័ត៌មានមិនចុះផ្សាយ ពីទីតាំងខាងលើនេះ ។ ដោយឡែក ភ្នាក់ងារ CAM POST ធ្វើដំណើរឆ្លងកាត់បានឃើញ​អ៊ូអរ​​ក៏ចុះទៅសួរនាំ​ ស្រាប់តែស្ត្រីដែលជាអ្នកមើលការខុសត្រូវចេញមកសួរនាំ ថាមករកអីដែរ? ហើយបានថតរូបភ្នាក់ងារយើងទៅវិញ​ ទើបភ្នាក់ងារយើងធ្វើការ Live ផ្ទាល់ពីទីតាំងនោះតែម្ដង ទើបអ្នកដែលកំពុងលេងនៅខាងក្នុងនាំគ្នាចេញមក ទាំងអ្នកកាសែត និងក្រុមអ្នកសារព័ត៌មាន របស់អង្គភាព និងស្ថាប័នមានតែឈ្មោះមួយចំនួននោះ ឡើងម៉ូតូជិះគេចចេញអស់ ក្រោយមកស្ត្រីដែលជាអ្នកមើលការខុសត្រូវទីតាំងហ្គេមបាញ់ត្រីនោះ ចេញមកចាក់សោរ ចេញទៅបាញ់ដែរ ។

ប្រជាពលរដ្ឋទាំងអស់នោះ បាននិយាយប្រាប់ភ្នាក់ងារ CAM POST ទៀតថា ប្រសិនបើលោកអភិបាលខណ្ឌច្បារអំពៅ និងអភិបាលរងខណ្ឌច្បារអំពៅ ពិតជាបានអនុញ្ញាតឲ្យទីតាំងល្បែងហ្គែមបាញ់ត្រីនេះបើកលេងវិញនោះ គឺលោកពិតជាថ្លើមប៉ុនមេឃហើយ ដែលហ៊ានប្រឆាំងទៅនឹងបទបញ្ជារបស់លោក ឃួង ស្រេង អភិបាលរាជធានី ដែលជាបុរសខ្លាំងទី២ បន្ទាប់ពីសម្តេចតេជោ នាយករដ្ឋមន្ត្រី ហ៊ុន សែន។ ប្រជាពលរដ្ឋ​បន្តថា ទីតាំង​ហ្គេម​បាញ់​ត្រី​ខាង​លើនេះ​ បាន​បើក​លេង​២៤​ម៉ោង​លើ​២៤​ម៉ោង ដោយ​មាន​ក្មេងស្ទាវជា​ច្រើន​នាក់ បាន​ចេញ​ចូល​លេង​យ៉ាង​សប្បាយ ធ្វើឲ្យ​អ្នក​ជិត​ខាង​មាន​ការ​ព្រួយ​បារម្មណ៍​ ព្រោះ​នៅ​ជិត​ទីតាំង​ខាង​លើ ​តែង​តែ​មាន​ការ​បាត់​បង់​សម្ភារៈ​ក៏​ដូច​ជា មាន​ចោរ​គាស់​ផ្ទះ​ជា​ដើម ។

ជុំវិញព័ត៌មានខាងលើ អង្គភាពព័ត៌មាន CAM POST បានធ្វើការទាក់ទងទៅលោកអភិបាលរងខណ្ឌច្បារអំពៅហើយ ដោយពុំទាន់ទទួលបានការបញ្ជាក់អ្វីនៅឡើយទេ៕

@Amapapa.News

Feature Ads