Thursday, August 30, 2018

បើករថយន្តដឹកទឹកកកយកដាក់ឲ្យម៉ូយ ងោកមួយភាំងរេចង្កូតបុកសួនពុះចែកទ្រូងផ្លូវ ក្រឡាប់ចាក់ទឹកកកពេញថ្នល់

អាម៉ាប៉ាប៉ាញ៉ូស

ភ្នំពេញៈ រថយន្តកូរ៉េដឹកទឹកកកមួយគ្រឿង បើកបរក្នុងល្បឿនលឿន តៃកុងងោកមួយភាំងរេចង្កូតមកបុកឡើងលើសួនក្រឡាប់រថយន្តចាក់ទឹកកករាយពេញផ្លូវ កាលពីវេលាម៉ោង៤៖៤០នាទីទាបភ្លឺ ឈានចូលថ្ងៃព្រហស្បតិ៍ ទី៣០ ខែសីហា ឆ្នាំ២០១៨ ស្ថិតនៅតាមបណ្តោយផ្លូវជាតិលេខ៦A សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។

តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេឃើញបុរសម្នាក់ រួមដំណើរគ្នា៣នាក់ បើករថយន្តកូរ៉េដឹកទឹកកកមួយគ្រឿង ពាក់ស្លាកលេខ ភ្នំពេញ 2AQ-1419 បើកតាមបណ្តោយផ្លូវជាតិលេខ៦A ទិសដៅពីកើតមកលិច​ ក្នុងល្បឿនលឿនហើយក៏ងោកមួយភាំងរេចង្កូតទៅបុកឡើងលើសួនពុះចែកទ្រូងផ្លូវ បណ្តាលឲ្យក្រឡាប់ចាក់ទឹកកកចេញពីរថយន្តអស់ រីឯឃឿនសួនពុះចែកទ្រូងផ្លូវរងការខូចខាតជាច្រើនកង់ តែសំណាងល្អមិនបង្កឲ្យមានអ្នករងរបួស ចំណែកតៃកុងរថយន្តក៏បានរត់គេចខ្លួនបាត់ស្រមោល ហើយក៏មានរថយន្តមួយគ្រឿងទៀត មកប្រមូលទឹកកកដែរសល់យកទៅ។

ក្រោយពេលកើតហេតុ សមត្ថកិច្ចជំនាញបានចុះមកដល់ទីតាំងកន្លែងកើតហេតុវាស់វែងនឹងស្ទូចយករថយន្តបង្កទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរងចាំភាគីតំណាងខាងរថយន្តចូលខ្លួនទៅដោះស្រាយតាមនីតិវិធីច្បាប់៕

@Amapapa.News

Feature Ads