បន្ទាយមានជ័យៈ នៅព្រឹកថ្ងៃទី៨ ខែសីហា ឆ្នាំ២០១៨ មន្រ្តីជំនាញសាខាកាំកុងត្រូលខេត្តបន្ទាយមានជ័យ សហការជាមួយមន្រ្តីមន្ទីរពាណិជ្ជកម្ម បានចុះត្រួតពិនិត្យទំនិញនៅ តាមផ្ទះលក់ទំនិញ ហាងលក់ទំនិញ និងផ្សារកណ្តាល ដើម្បីស្រាវជ្រាវទប់ស្កាត់នូវទំនិញខូចគុណភាព ដែលជនខិលខូចមួយចំនួនលួចបញ្ចេញមកលក់ ចែកចាយលើទីផ្សារ ។
ប្រតិបត្តិការត្រួតពិនិ្យធ្វើឡើង ក្រោមការដឹកនាំរបស់ លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្ត ដោយមានការសម្របសម្រួលពីលោក មាស ចន្ទ័ពិសិដ្ឋ ព្រះរាជាអាជ្ញាអមសាលាដំបូងខេត្តបន្ទាយមានជ័យ។
លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តបានថ្លែងថា ជានិច្ចកាលសាខាកាំត្រូលខេត្តតែងតែគិតគូរដល់សុខមាលភាពពលរដ្ឋតាមរយៈការចុះត្រួតពិនិត្យរឹតបណ្តឹងគុណភាពចំណីអារហារនៅតាមបញ្ជរលក់ដូរនានា និងទីផ្សារ។ ទាំងនេះ គឺតាមការអនុវត្តនូវការណែនាំរបស់អគ្គនាយកនៃអគ្គនាយកដ្ឋានកាំកុងត្រូលលោក ម៉ក់ ពេជ្ជឫទ្ធិ។
លោក ហុង លៀង អនុប្រធានសាខាកាំកុងត្រូលខេត្តទទួលបន្ទុកប្រធានការិយាល័យប្រមូលចំណូលនិងទីផ្សារបានឲ្យដឹងថា ដើម្បីត្រួតពិនិត្យទំនិញដែលជាចំណីអារហារសំដៅទប់ស្កាត់ទំនិញដែលហួសកាលបរិច្ឆេទប្រើប្រាស់ កាត់បន្ថយជាតិពុលនឹងលើកកម្ពស់សុខមាលភាពប្រជាពលរដ្ឋអ្នកប្រើប្រាស់។
ជាលទ្ធផលមន្ត្រីយើងបានរកឃើញ និងធ្វើការដកហូតបានទំនិញខូចគុណភាព និងហួសកាលបរិច្ឆេទប្រើប្រាស់ ចំនួន០៨មុខមានអាស៊ីដអាសេទិក នំផ្អែម ដំណាប់កន្ទួត ទឹកដោះគោ្រសស់ ទឹកក្រូច ទឹកសណ្តែកដប ភេសជ្ជ: និងទឹកសណ្តែកកំប៉ុង យកមករក្សាទុក ដើម្បីធ្វើការកំទេចចោលទៅតាមនិតិវិធីនៅពេលក្រោយ ។ មិនតែប៉ុណ្ណោះ មន្ត្រីជំនាញយើងក៏បានធ្វើការណែនាំ ផ្សព្វផ្សាយ អប់រំ ទៅដល់បងប្អូនអាជីវករអោយមានការយល់ដឹងអំពីសុវត្ថិភាពនឹងអ្នករងគ្រោះដោយចំណីអាហារ។
