Saturday, August 11, 2018

មន្រ្តីសមត្ថកិច្ច​​ ស្រវឹងស្រាបើករថយន្ត Ford ស្លាកលេខ2AQ-9687 ជែងរថយន្តកុងតៃន័រ ជ្រុល​បុកម៉ូតូច្រាសទិស របួសធ្ងន់ម្នាក់

អាម៉ាប៉ាប៉ាញ៉ូស

ភ្នំពេញៈ រថយន្ត Ford មួយគ្រឿង បើកបរដោយបុរសម្នាក់ អះអាងថា ខ្លួនជាសមត្ថកិច្ច តែមិនប្រាប់អង្គភាព ឬស្ថាប័នឡើយ​ ក្នុងស្ថានភាពស្រវឹង បើកបររថយន្តល្បឿនលឿន វ៉ាជែងរថយន្តកុងតៃន័រ រេចង្កូតធ្លាក់ចិញ្ចើមផ្លូវម្ខាង ជ្រុល​ទៅបុកម៉ូតូសេ១២៥ បើកច្រាសទិស បណ្តាលឲ្យបុរសម្នាក់ រងរបួសធ្ងន់។

គ្រោះថ្នាក់ចរាចរណ៍ខាងលើនេះ កើតឡើងកាលពីវេលាម៉ោង១០យប់ថ្ងៃទី១០ ខែសីហា ឆ្នាំ២០១៨ លើផ្លូវជាតិលេខ៣ ភូមិអង្គត្រគៀត សង្កាត់កន្ទោក ខណ្ឌពោធិសែនជ័យ ហើយម្ចាស់រថយន្តមិនឈប់ទទួលខុសត្រូវឡើយ ហើយព្យាយាមបើករត់គេច រហូតដល់មុខផ្សារកាណាស៊ី​ធី ផ្លូវវេងស្រេង ទើបចាប់រថយន្តបាន រួមទាំងអ្នកបើកបរផងដែរ។

រថយន្តបង្កម៉ាក Ford ពណ៌ស ពាក់ស្លាកលេខ ភ្នំពេញ 2AQ-9687 បើកបរដោយបុរសស្រវឹងម្នាក់ អះអាងថា ខ្លួនជាសមត្ថកិច្ច ។ ចំណែកម៉ូតូរងគ្រោះ ម៉ាកហុងដា សេ១២៥ សេរី២០១៦ ពណ៌ខ្មៅ ពាក់ស្លាកលេខភ្នំពេញ 1FP-0394 បើកបរដោយបុរសម្នាក់ រងរបួសធ្ងន់ធ្ងរ។

អ្នកឃើញហេតុការណ៍ បានឲ្យដឹងថា មុនកើតហេតុ គេឃើញ​ថយន្តបង្កបើកបរតាមបណ្តោយផ្លូវជាតិលេខ៣ ពីត្បូងទៅជើង ល្បឿនលឿន ជែងគេជែង​ឯង លុះដល់ចំណុចកើតហេតុ វ៉ាជែងរថយន្តកុងតៃន័រ ក៏រេចង្កូចធ្លាក់ចិញ្ចើមផ្លូវម្ខាងទៀត ទើបជ្រុលទៅបុកម៉ូតូជនរងគ្រោះច្រាសទិស បណ្តាលឲ្យដួលផ្លោងជាច្រើនម៉ែត្រ រងរបួសធ្ងន់ ហើយម្ចាស់​រថយន្តមិនបានឈប់ទទួលខុសត្រូវឡើយ បានបន្ដែមល្បឿនបើករត់ គាប់ជូនកម្លាំងល្បាតរបស់ប៉ុស្តិ៍ភ្លើងឆេះរទេះឃើញ រួមជាមួយកម្លាំងប៉ុស្តិ៍ផ្សេងទៀត ដេញតាមរហូតដល់ផ្លូវវេងស្រេង មុខផ្សារកាណាស៊ីធី ទើបស្ទាក់ចាប់បាន ឃាត់ទាំងអ្នកបើកបរ ។

ក្រោយកើតហេតុ ជនរងគ្រោះ ត្រូវបានរថយន្តគ្លីនិក រស្មី របស់អ្នកស្រី ខឹម រ៉ានី ដឹកយកទៅ ចំណែករថយន្តបង្ក និងម៉ូតូ រួមទាំងម្ចាស់រថយន្ត​ សមត្ថកិច្ចយកទៅរក្សាទុកនៅការិយាល័យចរាចរណ៍ជើងគោកក្រុងភ្នំពេញ រង់ចាំដោះស្រាយពេលក្រោយ៕

@Amapapa.News

Feature Ads