សៀមរាបៈ នៅមុខប្រាសាទអង្គរវត្ត នៅរសៀលថ្ងៃទី៩ ខែសីហា ឆ្នាំ២០១៨ ក្រសួងទេសចរណ៍ សហការជាមួយអាជ្ញាធរជាតិអប្សរា និងរដ្ឋបាលខេត្តសៀមរាប បានរៀបចំពិធីប្រគល់ និងទទួលពានរង្វាន់ ពីតំណាងទីភ្នាក់ងារប្រឹក្សាយោបល់លើការធ្វើដំណើរ (TripAdvisor) ដែលប្រាសាទអង្គរវត្តជាប់លេខ១ ជាសំណង់ប្រវត្តិសាស្រ្ដដ៏អស្ចារ្យបំផុត ក្នុងចំណោមសំណង់ប្រវត្ដិសាស្រ្ដល្បីៗ លើពិភពលោក សម្រាប់ឆ្នាំ២០១៨។ តំណាង TripAdvisor បានលើកឡើងថា ប្រាសាទអង្គរវត្តពិតជាមានតម្លៃដ៏មហាសាល និងមានភាពអស្ចារ្យបំផុត ដែលស័ក្ដិសមនឹងទទួលបានពានរង្វាន់នេះ ។
ក្នុងពិធីប្រគល់ និងទទួលពានរង្វាន់នៅបរិវេណមុខប្រាសាទអង្គរវត្ត តំណាង TripAdvisor លោកស្រី សារ៉ា ម៉ាធ្យស៍ បានលើកឡើងថា ការផ្តល់ចំណាត់ថ្នាក់លេខ១ ដល់ប្រាសាទអង្គរវត្តរបស់កម្ពុជា ជាសំណង់ប្រវត្តិសាស្រ្ដដ៏អស្ចារ្យបំផុត សម្រាប់ឆ្នាំ២០១៨នេះ ធ្វើឡើងតាមរយៈការស្រង់មតិរយៈពេល១២ខែ លើចំណាប់អារម្មណ៍ និងទស្សនៈរបស់អ្នកទេសចររាប់លាននាក់ ជុំវិញពិភពលោក កាលពីថ្ងៃទី២២ ខែឧសភា ឆ្នាំ២០១៨ ។
លោកស្រីបន្ថែមថា ចំណុចពិសេសដែលលោកស្រីចាប់អារម្មណ៍លើប្រាសាទអង្គរវត្តនោះ គឺសំណង់ស្ថាបត្យកម្ម ទិដ្ឋភាពថ្ងៃរះ និងថ្ងៃលិច ដែលមានពណ៌មាស ជិះរស្មីភ្លឺចែងចាំងប៉ះសំណង់ប្រាសាទ ដែលធ្វើឲ្យអង្គរវត្តមានភាពអស្ចារ្យក្នុងអារម្មណ៍ភ្ញៀវទេសចរគ្រប់រូប ។
លោក សុខ សង្វារ អគ្គនាយករងអាជ្ញាធរជាតិអប្សរា ទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរ បានបង្ហាញសុទិដ្ឋិនិយម តាមរយៈការទទួលបានពានរង្វាន់នេះ ដែលនឹងធ្វើឲ្យទេសចរកាន់តែច្រើនទៀត ចង់ស្គាល់ និងធ្វើដំណើរមកទស្សនាប្រាសាទអង្គរវត្ត។ ជាមួយគ្នានេះ លោកក៏បានរម្លឹកពីការងារ និងការខិតខំប្រឹងប្រែងជាច្រើន របស់អាជ្ញាធរជាតិអប្សរា លើការងារអភិរក្ស និងអភិវឌ្ឍន៍រមណីយដ្ឋានអង្គរ តាំងពីពេលបង្កើតស្ថាប័នអាជ្ញាធរជាតិអប្សរា រហូតមកដល់ទល់នឹងបច្ចុប្បន្ន ។
រដ្ឋមន្រ្ដីក្រសួងទេសចរណ៍ លោក ថោង ខុន បានថ្លែងថា ការរីកចម្រើននៃវិស័យទេសចរណ៍កម្ពុជា ពិតជាមិនអាចកាត់ផ្តាច់ចេញពីការបង្កើនភាពទាក់ទាញរបស់កម្ពុជា ជាគោលដៅទេសចរណ៍ដ៏ទាក់ទាញ ប្រកបដោយគុណភាព ទាំងកម្រិតតំបន់ និងពិភពលោក ព្រមជាមួយការដឹកនាំប្រកបដោយភាពវៃឆ្លាត។ លោកបន្ថែមថា ក្រសួងទេសចរណ៍ បេ្ដជ្ញាចិត្តបន្តដឹកនាំវិស័យទេសចរណ៍កម្ពុជា ឲ្យកាន់តែរីកចម្រើន ប្រកបដោយនិរន្តរភាព និងការទទួលខុសត្រូវខ្ពស់ ហើយអំពាវនាវដល់ភាគីពាក់ព័ន្ធ ចូលរួមដើម្បីជំរុញការផ្សព្វផ្សាយវិស័យទេសចរណ៍កម្ពុជា ឲ្យកាន់តែខ្លាំងក្លាបន្ថែមទៀត៕
