header ads

Sponsor

ពិសី

ភ្នំពេញៈ ​មន្ត្រី​យោធា​ម្នាក់​ ត្រូវ​បាន​សមត្ថកិច្ច​នគរបាល​ខណ្ឌ​សែន​សុខ ​ឃាត់ខ្លួនពី​បទ​ប្រើប្រាស់​អាវុធ​ខ្លី​ភ្ជង់​គំរាម និង​វាយដំ​លើ​បុរស​ម្នាក់ ​លក់​ប្រហិត​ចៀន​ចល័ត​តាម​ផ្លូវដោយ​រ៉ឺម៉ក​ម៉ូតូ ដែល​ទំនាស់​នេះ​ ផ្តើម​ចេញពី​ករណី​គ្រោះថ្នាក់​ចរាចរណ៍​កើតឡើង​កាលពី​យប់​ថ្ងៃទី​២ ខែសីហា ឆ្នាំ​២០១៨ នៅ​ចំណុចភូមិ​រោងចក្រ ម្តុំក្បែរ​វត្ត​សំរោង​អណ្តែត ស្ថិត​ក្នុង​សង្កាត់​គោក​ឃ្លាង ខណ្ឌ​សែន​សុខ​ រាជធានីភ្នំពេញ។

មន្ត្រី​យោធា​ខាងលើ​ឈ្មោះ នួន ប៉ូ ភេទ​ប្រុស​ អាយុ​៤៩​ឆ្នាំ មុខរបរ​មន្ត្រី​យោធា ទីលំនៅ​ម្តុំ​សង្កាត់​ផ្សារ​ដេប៉ូ​៣ ខណ្ឌទួលគោក​ រាជធានី​ភ្នំពេញ​។

​ប៉ូលិស​ឲ្យ​ដឹង​ថា មុន​ពេល​កើតហេតុ ភាគី​ជនរងគ្រោះឈ្មោះ យ៉ែម​ វណ្ណៈ ភេទប្រុស​ អាយុ​២៧​ឆ្នាំ កំពុង​លក់​ប្រហិត​ចៀន​ចល័ត​តាម​រ៉ឺម៉កនៅ​ម្តុំ​ក្បែរ​វត្ត​សំរោង​អណ្តែត​។ ក្រោយមក​ ក៏​ស្រាប់​តែ​មាន​រថយន្ត​បា​ឡែ​ន​មួយគ្រឿង ​ពាក់​ស្លាក​លេខ ភ្នំពេញ​ 2AB-4119 បើកបរ​ដោយ​ឈ្មោះ សៅ ចាន់​ធី ភេទ​ប្រុស ​អាយុ៤៦​ឆ្នាំ មុខរបរ​គ្រូបង្រៀន មាន​ទីលំនៅ​ម្តុំ​សង្កាត់​ទួល​សង្កែ ខណ្ឌឫស្សីកែវ បាន​បើករថយន្ត​មក​ប៉ះ​រ៉ឺម៉ក​លក់​ប្រហិត​របស់​គាត់ រួច​ក៏​បើក​ទៅ​បាត់​។

ក្រោយមក​មួយ​ស្របក់ ​មន្ត្រី​យោធា​ខាងលើ​ ក៏បាន​បើកបរ​រថយន្ត​របស់​ខ្លួន​ម៉ាក ព្រូស ពាក់​ស្លាក​លេខ ​2AM-6485 ឆ្លងកាត់​ទីនោះ ក៏​ស្រាប់តែ​បុរស​អ្នកលក់​ប្រហិត​នោះ​បក់ដៃឲ្យ​ឈប់​ ហើយ​បាន​កាន់​ដំ​ថ្ម​គប់​មកលើ​រថយន្ត​រប​ស់​មន្ត្រី​យោធា​នោះ ​បណ្តាល​ឲ្យ​បែក​កញ្ចក់​ខាងមុខ​។

ប្រភព​ដដែល​បន្ត​ថា ភ្លាម​នោះ​មន្ត្រី​យោធា ក៏បាន​ឈប់​រថយន្ត​ចុះ​មក​សួរនាំ​ តែ​នៅ​ពេល​ឃើញ​អ្នកលក់​ប្រហិត​នោះ​កាន់​ដុំ​ថ្ម​នៅ​ដៃ​ ក៏​ចូលក្នុង​ឡាន​យក​កាំភ្លើងខ្លី​មក​ភ្ជង់​ និងវាយ​ចំក្បាលឲ្យរបួសស្រាល ដើម្បី​ឲ្យ​បញ្ឈប់​សកម្មភាព​។ ភ្លាមៗ​នោះ​ដែរ​ សមត្ថកិច្ច​មូលដ្ឋាន​ បាន​មក​ទាន់​ក៏​អន្តរាគមន៍​ឃាត់ខ្លួន​ទាំងសងខាង​យកមក​សួរនាំ​។

​ចំណែក​ភាគីអ្នកលក់​ប្រហិត​វិញ ​បាន​និយាយ​ថា ភាគីរថយន្ត​ម៉ាក ​បា​ឡែ​ន ​ស្រវឹង​ស្រាបើក​មក​ប៉ះ​រ៉ឺម៉ក​គាត់​កំពុង​ចៀន​ប្រហិត បណ្តាល​ខ្ទាត​ខ្លាញ់​ត្រូវ​គាត់ ​និង​អ្នក​ទិញ​ម្នាក់ ​រលាក មិន​ព្រម​ឈប់ ​ហើយ​បើក​រត់​ទៀត​។ នៅពេល​គាត់​តាម​ទាន់ នៅ​ត្រង់​ផ្លូវកែងហាណូយ អ្នក​ជិះរថយន្ត ​បា​ឡែ​ន ​បាន​ហៅ​បក្ខពួក​ជាម​ន្ត្រី​យោធា​នោះ ​ឲ្យ​មក​ជួយ​អន្តរាគមន៍។ ពេលនោះ​ ប្រជាជន​បាន​គប់​កញ្ចក់រថយន្ត​របស់គាត់​បែក​ខាងមុខតែម្ដង។

សម្រាប់ករណីនេះ វរសេនីយ៍ទោ គួ​ក សុខ​ហួរ អធិការរង​ទទួលផែន​ព្រហ្មទណ្ឌ​ខណ្ឌ​សែន​សុខ បញ្ជាក់ឲ្យដឹងថា សមត្ថកិច្ច​បាន​ទុក​ពេល​ឲ្យ​ភាគី​ទាំង​២​នាក់​ សម្របសម្រួល​គ្នា​បញ្ចប់រឿង ​ប៉ុន្តែភាគី​ខាង​អ្នកលក់​ប្រហិត​ចៀន​មិន​ព្រម​ ដោយទាមទារ​លុយ​សំណង​ជំងឺចិត្ត​រាប់ពាន់​ដុល្លារ​ឯណោះ​។ ដូច្នេះ សមត្ថកិច្ច​អាច​នឹង​បញ្ជូន​ឲ្យ​ពួកគេ​ ទៅ​ដោះស្រាយ​នៅ​តុលាការ​វិញ៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post