ថៃៈ លោកអនុប្រធានមន្ទីរសុខាភិបាលខេត្តប៉ៃលិន បានរងរបួសធ្ងន់ រីឯប្រពន្ធ បានស្លាប់តាមផ្លូវពេលបញ្ជូនទៅសង្គ្រោះនៅឯមន្ទីរពេទ្យខេត្តច័ន្ទបូរី ក្រោយជួបឧបទ្ទវហេតុគ្រោះថ្នាក់ចរាចរណ៍រវាងរថយន្តបុកជាមួយរថយន្ត នៅប្រទេសថៃ កាលពីវេលាម៉ោង៨និង២០នាទីយប់ ថ្ងៃសុក្រ ៥រោច ខែស្រាពណ៍ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី៣១ ខែសីហា ឆ្នាំ២០១៨។
តាមសេចក្តីរាយការណ៍បានឱ្យដឹងថា គ្រោះថ្នាក់ចរាចរណ៍នេះ បង្កឡើងរវាងរថយន្តថៃបុកជាមួយរថយន្តកម្ពុជា ម៉ាក CRV ពណ៌ប្រាក់ មិនស្គាល់ស្លាកលេខ ស្ថិតនៅលើបណ្តោយផ្លូវជាតិ ក្នុងស្រុកពោងណាំរ៉ន ខេត្តចាន់បូរី ប្រទេសថៃ បណ្តាលឲ្យរថយន្តទទួលរងការខូចខាតទាំងស្រុង ចំណែកអ្នកបើកបររថយន្តភាគីថៃមិនស្គាល់អត្តសញ្ញាណ ក្រោយកើតហេតុបើកទ្វាររថយន្តគេចខ្លួនបាត់ស្រមោល។
ប្រភពព័ត៌មានបានឱ្យដឹងថា ស្ត្រីរងគ្រោះដែលស្លាប់ឈ្មោះ ឃាង ធារ៉ាថន អាយុ៤១ឆ្នាំ ជានាយកស្តីទីចាត់ការហិរញ្ញវត្ថុសាលាខេត្តប៉ៃលិន ត្រូវជាប្រពន្ធលោក សៀក រតនៈ អាយុ៥០ឆ្នាំ អនុប្រធានមន្ទីរសុខាភិបាលខេត្តប៉ៃលិន រងរបួសធ្ងន់ កំពុងសង្គ្រោះនៅមន្ទីរពេទ្យខេត្តចាន់បូរី ៕