អមេរិកៈ រដ្ឋមន្ត្រីការពារជាតិអាមេរិក លោក Jame Mattis បានច្រានចោលការលើកឡើងថា លោកធ្លាប់មើលងាយប្រធានាធិបតី លោក ដូណាល ត្រាំថា ជាមនុស្សដែលមានចំណេះដឹងស្មើនឹងថ្នាក់ទី៥ ឬទី៦ប៉ុណ្ណោះ។
នៅក្នុងសៀវភៅ ដែលបាននិពន្ធដោយអ្នកសារព័ត៌មានជើងចាស់ លោក Bob Woodward ដែលមានចំណងជើងថា "ភ័យខ្លាច" បានលើកឡើងពីកិច្ចប្រជុំគណៈកម្មការសន្តិសុខជាតិ NSC ពេលនោះ មេទ័ពផ្កាយ៤ លោក Mattis ធ្លាប់ប្រឈមមុខតានតឹង ក្រោយពេលលោក ត្រាំ សួរនាំពីយុទ្ធសាស្ត្រយោធា នៅឧបទ្វីបកូរ៉េ។
អ្នកសារព័ត៌មាន Woodward ធ្លាប់លាតត្រដាងពីការលួចស្តាប់ Watergate បង្ខំឲ្យអតីតប្រធានាធិបតី លោក Richad Nixon ដើម្បីបញ្ចៀសការចោទប្រកាន់ទោស បានលាលេងពីតំណែងនៅឆ្នាំ១៩៧៣។ បច្ចុប្បន្ លោក Woodward ជាជំនួយការនិពន្ធនាយកសារព័ត៌មាន វ៉ាស៊ីនតោន ប៉ុស្តិ៍។
នៅក្នុងសៀវភៅ ស្តីពីការភ័យខ្លាចខាងលើ នឹងត្រូវបោះពុម្ពនៅសប្តាហ៍ក្រោយ បាននិយាយពីភាពចលាចលនៅសេតវិមាន ក្រោមការដឹកនាំរបស់លោក ត្រាំ ជាកន្លែងដែលជំនួយការផ្ទាល់របស់លោក បាននិយាយអាក្រក់ពីមេរបស់ខ្លួននៅក្រោយខ្នងថា មិនយល់ដឹងអ្វីពីការដឹកនាំប្រទេសជាតិ ដូចជាគោលនយោបាយការបរទេស សន្តិសុខ...។
នៅក្នុងសៀវភៅ បានសរសេរថា រដ្ឋមន្ត្រីការពារជាតិ Mattis ធ្លាប់បកស្រាយជាមួយលោក ត្រាំ ថា យើងត្រូវធ្វើយ៉ាងណា ដើម្បីបញ្ចៀសសង្គ្រាមលោកលើកទី៣។ ប៉ុន្តែនៅពេលដែលលោក ត្រាំ ចាកចេញពីបន្ទប់ប្រជុំ លោក Mattis បង្ហាញក្តីបារម្ភ និងនឿយហត់។ មានព័ត៌មានផ្សាយថា ជំនួយការលោក ត្រាំ ធ្លាប់និយាយថា ការដោះស្រាយបញ្ហារបស់លោក ត្រាំ ដូចនឹងអ្នកមានចំណេះវិជ្ជាថ្នាក់ទី៥ ឬទី៦តែប៉ុណ្ណោះ៕
