ភ្នំពេញៈ លោកឧត្តមសេនីយ៍ (ផ្កាយ២) ម្នាក់ មានប្រពន្ធហើយ លួចលាក់ចិញ្ចឹមស្រីស្នេហ៍ ត្រូវប្រពន្ធដើមតាមទាន់ ក៏ផ្ទុះហិង្សារវាយបំបែកកញ្ចាក់រថយន្ត៥៧០មួយគ្រឿង និងកញ្ចក់ទ្វារផ្ទះរងការខូចខាតយ៉ាងដំណំ បង្កការភ្ញាក់ផ្អើលទាំងយប់ដល់ប្រជាពលរដ្ឋ និងសមត្ថកិច្ចនគរបាល ព្រមទាំងកងរាជអាវុធហត្ថមកចោមរោមឈរមើលព្រោងព្រៀត។
ហេតុការណ៍ប្រពន្ធតាមប្ដីលួចមានស្រីខាងលើនេះ កើតឡើងកាលពីវេលាម៉ោង៩និង៣០នាទីយប់ថ្ងៃទី២៥ ខែកញ្ញា ឆ្នាំ២០១៨ ត្រង់ចំណុចមុខផ្ទះលេខ៦R ផ្លូវលេខ៥ ក្នុងបុរីលឹមឈាងហាក់ចំការដូង សង្កាត់ដង្កោ ខណ្ឌដង្កោ រាជធានីភ្នំពេញ។
តាមសម្ដីប្រពន្ធដើម បានឲ្យដឹងថា បុរសស្វាមី ដែលលួចចិញ្ចឹមស្រីនោះ ឈ្មោះ ឡុង ទិត្យ មុខរបរមន្រ្ដីកងរាជអាវុធហត្ថលើផ្ទៃប្រទេស ឋាន្តរស័ក្តិឧត្តមសេនីយ៍ទោ (ផ្កាយ២)។
ស្រ្ដីជាប្រពន្ធដើម បានប្រាប់ឲ្យដឹងទៀតថា គាត់បានចាប់ដៃគ្នាជាមួយនឹងស្វាមីរបស់គាត់អស់រយៈពេលជាង១០ឆ្នាំមកហើយ មានកូនដល់ទៅបីនាក់ក្នុងបន្ទុក។ ក្នុងរយៈពេលកន្លងមកគាត់រកស៊ីទិញដីលក់ដីកាន់តែមានឡើងៗរហូតដល់មានផ្ទះវីឡា មានមុខរបរលក់ឡានទិញឡាន និងស្វាមីបានធ្វើការនៅកងរាជអាវុធហត្ថលើផ្ទៃប្រទេសឋាន្តរស័ក្តិ ឧត្តមសេនីយ៍ទោ (ផ្កាយ២) ។ ប្រពន្ធបន្ដថា មួយរយៈពេលនេះ ប្ដីរបស់គាត់មានចរិតប្លែកៗ ចេះដើរបាត់ពីផ្ទះ និងវាយប្រពន្ធជាំមុខជាំមាត់ទៀត។ លុះមកដល់ថ្ងៃកើតហេតុខាងលើ ប្រពន្ធរបស់គាត់បានតាមទាន់ឃើញស្វាមីរបស់គាត់ បានមកឈប់រថយន្តនៅមុខផ្ទះមួយទៅផ្ទះលេខ6R ផ្លូវលេខ5 ក្នុងបូរីលឹមឈាងហាក់ចំកាដូង ដោយសារតែខឹងពេកគាត់បានយកដុំថ្មវាយកញ្ចក់ឡាន ឡិចស៊ីស៥៧០ (Lexus 570) ពាក់ស្លាកលេខភ្នំពេញ 2AY-8787 ដែលប្ដីជិះ ខាងក្រោយ និងខាងចំហៀង ព្រមទាំងបំបែកកញ្ចក់ផ្ទះ បណ្ដាលឲ្យខូចខាតយ៉ាងដំណំ។
ដោយឡែកភាគីខាងស្វាមី ព្រមទាំងប្រពន្ធចុង មិនឃើញនៅក្នុងផ្ទះប្រហែលសម្ងំ ឬក៏ចេញតាមទ្វារក្រោយបាត់ក៏មិនដឹង មិនហ៊ានចេញមកតតាំងឡើយ។
ក្រោយមកខាងប្រពន្ធដើមបានចេញទៅព្យាបាលរបួសជើង ហើយក៏ទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលដង្កោ ដើម្បីបញ្ជូនសំណុំរឿងទៅតាមនីតិវិធីច្បាប់៕
